హైదరాబాద్ , వెలుగు: ఏది కావాలన్నా ఆన్ లైన్ లో ఆర్డర్ కొట్టేసే కాలమిది. దానికి తగినట్టే విజయా డెయిరీ కూడా తన తీరును మార్చుకుంది. పాల ఉత్పత్తులను ఆన్ లైన్ లో అమ్మకానికి పెడుతోంది. బిగ్ బాస్కెట్ , డెయిలీడాట్ కామ్ , సూపర్ డెయిలీ, ఫ్లిప్ కార్ట్, అమెజాన్ నౌ వంటి ఆన్ లైన్ స్టోర్లలో వాటిని అందించేందుకు నిర్ణయించింది. పాలు, నెయ్యి, ఫ్లేవర్డ్ మిల్క్, దూద్ పేడ.. వంటి విజయ ఉత్పత్తులను ఆన్ లైన్ లో అందుబాటులోకి తెస్తున్నట్టు పశుసంవర్థక శాఖ కార్యదర్శి సందీప్ కుమార్ సుల్తానియా చెప్పారు.
అయితే, పాలు కావాలంటే మాత్రం ఓ రోజు ముందే బుక్ చేసుకోవాల్సి ఉంటదని డెయిరీ అధికారులు చెబుతున్నారు. ఫ్లిప్ కార్ట్లో ప్రస్తుతం విజయ నెయ్యి మాత్రమే లభిస్తోంది. మార్చి మొదటి వారం నుంచి అమెజాన్ నౌలో పాల ఉత్పత్తులన్నీ అందుబాటులో ఉంటాయి. మజ్జిగ, లస్సీ, దూద్ పేడ వంటి వాటిని సరఫరా చేయడానికి ప్రయత్నాలు చేస్తున్నట్టు అధికారులు చెబుతున్నారు.
