- విజృంభిస్తున్న వైరల్ ఫీవర్
- ప్లేట్లెట్లు తగ్గుతుండడంతో ఆందోళనలో ప్రజలు
నాగర్కర్నూల్, వెలుగు: జిల్లాలో వైరల్ జ్వరాలు విజృంభిస్తున్నాయి. బాధితులు గవర్నమెంట్, ప్రైవేట్ హాస్పిటల్స్ కు క్యూ కడుతున్నారు. జిల్లా కేంద్రంలోని ప్రభుత్వ హాస్పిటల్ మొదలుకుని కల్వకుర్తి, అచ్చంపేట, కొల్లాపూర్, అమ్రాబాద్ కమ్యూనిటీ హాస్పిటల్స్లో దాదాపు ఇదే పరిస్థితి ఉంది. ఏజెన్సీలోని అమ్రాబాద్, లింగాల, పదర, బల్మూర్, కొల్లాపూర్, పెద్దకొత్తపల్లిలో బెడ్స్ ఫుల్ అయ్యాయి. ప్రభుత్వ ఆస్పత్రుల్లో టెస్టులు, ట్రీట్మెంట్కు ఇబ్బంది లేకపోయినా డాక్టర్లు, సిబ్బంది కొరత కారణంగా ప్రైవేట్ హాస్పిటల్స్ను ప్రిఫర్ చేస్తున్నారు. ప్రైవేట్ హాస్పిటల్స్లో టెస్టులు, మందులు, బెడ్ చార్జీలు అంటూ వేలకు వేలు వసూలు చేస్తున్నారు.
పెరుగుతున్న రోగులు..
జిల్లా కేంద్రంలోని ప్రభుత్వ జనరల్ అస్పత్రిలో జులై నుంచి ఫీవర్ కేసుల సంఖ్య 280 దాటింది. ఇందులో 8 డెంగీ కేసులున్నాయి. మున్సిపాలిటీలు, గ్రామాల్లో పారిశుద్ధ్య పనులు అంతంత మాత్రంగానే చేపడుతున్నారు. మున్సిపల్, పంచాయతీ, మెడికల్ అండ్ హెల్త్ డిపార్ట్మెంట్ ఆధ్వర్యంలో ఫాగింగ్, బ్లీచింగ్ పనులు చేపట్టడానికి ఫండ్స్ ఉన్నా పర్యవేక్షణ లేక దోమలు పెరుగుతున్నాయి. డెంగీ. టైఫాయిడ్ కేసులతో ప్రభుత్వ, ప్రైవేట్ హాస్పిటల్స్కు వెళ్తున్నవారు ప్లేట్లెట్స్ తక్కువ అవుతున్నాయనే భయంతో హైదరాబాద్కు వెళ్తున్నారు. కల్వకుర్తి ప్రభుత్వ ఆసుపత్రిలో జులైలో 30 కేసులు, ఆగస్టులో 115 వైరల్ ఫీవర్ కేసులు నమోదయ్యాయి.
ALSO READ: దేశానికి అన్నం పెట్టే స్థాయికి తెలంగాణ ఎదిగింది: కేటీఆర్
వీటిలో మైనర్ డెంగీ లక్షణాలు ఉన్న కేసులు నమోదైనప్పటికీ ట్రీట్మెంట్తో తగ్గాయి. డెంగీ, వైరల్ ఫీవర్ టెస్టులు, మందులు ప్రభుత్వ ఆసుపత్రిలో అందుబాటులో ఉన్నాయని డాక్టర్లు చెబుతున్నారు. అమ్రాబాద్ 15 టైఫాయిడ్, 30 వైరల్ ఫీవర్ కేసులు నమోదయ్యాయి. ఆగస్టులో లింగాల ప్రభుత్వ ఆసుపత్రిలో 6 డెంగీ కేసులు, సెప్టెంబర్లో 5 డెంగీ కేసులు నమోదయ్యాయి. అచ్చంపేట గవర్నమెంట్ హాస్పిటల్లో గత నెలలో 91 వైరల్ ఫీవర్ రోగులు వచ్చారు. కొల్లాపూర్ గవర్నమెంట్ హాస్పిటల్లో 61 వైరల్ ఫీవర్ కేసులు నమోదయ్యాయి. వాతావరణంలో మార్పులు, వర్షాభావ పరిస్థితులతో ఆగస్టులో వైరల్ ఫీవర్ కేసులతో పాటు సర్ది, దగ్గు, గొంతు నొప్పి కేసులు పెరిగాయి.
అవుట్ పేషెంట్లు ఫుల్..
జిల్లాలో వివిధ రకాల వ్యాధులతో బాధ పడుతున్న వారి సంఖ్య భారీగా పెరుగుతోంది. ప్రతి రోజు వందలాది మంది గవర్నమెంట్ ఆసుపత్రులకు క్యూ కడుతున్నారు. నాగర్ కర్నూల్ జిల్లా ఆసుపత్రిలో ప్రతి రోజు -800 నుంచి -900 అవుట్ పేషెంట్లు ట్రీట్మెంట్ కోసం వస్తున్నారు. కల్వకుర్తి కమ్యూనిటీ హెల్త్ సెంటర్లో 350 నుంచి- 400, అచ్చంపేటలో 200 నుంచి- 300, కొల్లాపూర్ లో 200 నుంచి-300, కల్వకుర్తి సీహెచ్సీల్లో 300 నుంచి-400 వరకు ఓపీ నమోదవుతోంది. పీహెచ్సీలకు ప్రతి రోజు 40 మంది వరకు, బస్తీ దవాఖానలకు 20 మంది చొప్పున అవుట్ పేషెంట్స్ ట్రీట్మెంట్కు వస్తున్నారు
ఐదు రోజుల్లో రూ.23 వేలు ఖర్చు..
నా మేనల్లుడు రఘు(15) జ్వరం, దగ్గు, వాంతులతో బాధపడుతుంటే కల్వకుర్తిలో ప్రైవేట్ హాస్పిటల్కు తీసుకపోయినం. డెంగీ లక్షణాలు ఉండడంతో ట్రీట్మెంట్ చేయించినం. ఐదు రోజులకు రూ.23 వేలు ఖర్చయింది. కూలీ పని చేసుకునేటోళ్లం. అక్కడ ఇక్కడ తెచ్చి చూపించాల్సి వచ్చింది. గవర్నమెంట్ హాస్పిటల్లో పట్టించుకుంటే మాలోంటళ్లకు మంచిగ ఉంటది.
ప్రమోద్, తర్నికల్ తండా
