ముషీరాబాద్, వెలుగు: ప్రపంచంలోనే మన సంస్కృతి చాలా గొప్పదని మహారాష్ట్ర మాజీ గవర్నర్ సీహెచ్ విద్యాసాగర్ అన్నారు. అన్ని దేశాల వారిని గౌరవిస్తామని, కానీ చైనా మనపై కుతంత్రాలు ఆపడం లేదని విమర్శించారు. బాగ్లింగంపల్లిలోని సుందరయ్య విజ్ఞాన కేంద్రంలో 21 సెంచరీ ఐఏఎస్ అకాడమీ ఆధ్వర్యంలో ఐఏఎస్ టాపర్స్ సన్మాన కార్యక్రమం నిర్వహించారు.
సివిల్స్ ప్రిపేర్ అయ్యే అభ్యర్థులతో ఫేస్ టు ఫేస్ నిర్వహించారు. ఈ కార్యక్రమానికి మాజీ గవర్నర్ విద్యాసాగర్ రావు, అడిషనల్ డీజీపీ మహేశ్ భగవత్ హాజరయ్యారు. ఈ సందర్భంగా విద్యాసాగర్ రావు మాట్లాడుతూ.. సివిల్స్ ప్రిపేరయ్యే వారు, ఐఏఎస్లుగా ఎంపికైనవారు దేశ భవిష్యత్, సమాజ పురోగతికి కృషి చేయాలని సూచించారు.
అకాడమీ చైర్మన్ కృష్ణ ప్రదీప్, రిటైర్డ్ ఐఏఎస్ అధికారులు గోపాలకృష్ణ, బీపీ ఆచార్య, వీఎన్ విష్ణు, చక్రపాణి, చిరంజీవులు, ప్రొఫెసర్ గణేశ్ తదితరులు పాల్గొన్నారు.
