- వెబ్సైట్, టీఈపోల్లో పూర్తి సమాచారం
- వివరాలు వెల్లడించిన రాష్ట్ర ఎన్నికల సంఘం
హైదరాబాద్, వెలుగు: రాష్ట్రంలో మున్సిపల్ ఎన్నికల పోలింగ్ బుధవారం జరుగనుంది. 7 కార్పొరేషన్లు, 116 మున్సిపాలిటీల్లో 52.17 లక్షల మంది ఓటు వేయనున్నారు. ఈ నేపథ్యంలో ఓటర్ స్లిప్ అందని ఓటర్లు ఆన్లైన్లో చాలా ఈజీగా ఓటర్ స్లిప్ పొందొచ్చని ఎన్నికల సంఘం మంగళవారం తెలిపింది. ప్రభుత్వ వెబ్సైట్, టీఈ పోల్ ద్వారా సమాచారాన్ని తెలుసుకోవచ్చని వెల్లడించింది.
ముందుగా ఓటర్లు గూగుల్లో తెలంగాణ స్టేట్ఎలక్షన్ కమిషన్ వెబ్సైట్(tsec.gov.in) ఎంటర్ చేయగానే బ్లాగ్ ఓపెన్ అవుతుంది. అందులో "Voter Portal" పై క్లిక్ చేయగానే ఎడమ వైపు బార్లో నాలుగు ఆప్షన్లు కనిపిస్తాయి. అందులో మొదటిది "Download Voter Slip by EPIC ID -Urban, 2025" పై క్లిక్ చేయాలి. ‘ఆర్డినరీ ఎలక్షన్స్ టు మున్సిపాలిటీస్–2025, సెర్చ్ వోటర్ స్లిప్ బై ఎంపిక్ నంబర్’ విండో ఓపెన్ అవుతుంది.
దీని కిందనే జిల్లా, మున్సిపాలిటీ, వార్డు, ఎపిక్ నంబర్ లాంటి వివరాలు అడుగుతుంది. అవి ఇచ్చాక.. సెర్చ్ వోటర్– తెలుగు, సెర్చ్ వోటర్–ఇంగ్లిష్లో ఏదో ఒక దానిపై క్లిక్ చేస్తే ఓటర్ స్లిప్, మున్సిపాలిటీ, వార్డు నంబరు, పోలింగ్ కేంద్రం, క్రమ సంఖ్య, పేరు, ఎపిక్ నంబర్ ఇతర వివరాలు కన్పిస్తాయి. మీరు ఆ పేపర్ను ప్రింట్ తీసుకోవచ్చు.. లేదంటే ఒక కాగితంపై రాసుకొని పోలింగ్ సెంటర్కు వెళ్లి చూపించినా సరిపోతుందని ఎన్నికల సంఘం తెలిపింది.
టీఈపోల్ ఫోన్ యాప్ ద్వారా తెలుసుకోవచ్చు
ఫోన్లో ప్లే స్టోర్ నుంచి "Te-poll" యాప్ను డౌన్ లోడ్ చేసుకోవాలి. డ్యాష్ బోర్డులో పైన కనిపించిన ‘Voter slip download’ క్లిక్ చేయాలి. దాంట్లో మొదటి డ్రాప్ డౌన్లో మీ జిల్లా ఎంపిక చేసుకొని ఎపిక్ నంబరు ఇచ్చి "Search" చేయాలి. వోటర్ స్లిప్ కన్పిస్తుంది. దాన్ని సేవ్ చేసుకోవచ్చు. స్లిప్లో చూపించిన వివరాలు పోలింగ్ కేంద్రంలో చెప్పి మీ దగ్గరున్న గుర్తింపు కార్డు చూపించి ఓటు వేయవచ్చు.
