ప్రతిరోజూ మధ్యాహ్నం ఒకే సమయానికి మీకు విపరీతమైన నిద్ర, అలసట వస్తున్నాయా..? ఏకాగ్రత దెబ్బతిని, పని చేయాలనిపించడం లేదా..? అయితే ఇది మీ ఒక్కరి సమస్యే కాదు. మధ్యాహ్నం వచ్చే ఈ నీరసానికి మీరు చేసే పని కంటే, మీ జీవనశైలి (Lifestyle) ప్రధాన కారణం.
1. మీరు తిన్న భోజనం
మధ్యాహ్నం పూట తెల్ల అన్నం, చక్కెర పదార్థాలు లేదా పిండి పదార్థాలు (Carbs) ఎక్కువగా ఉండే భోజనం చేస్తే.. రక్తంలో షుగర్ లెవల్స్ ఒక్కసారిగా పెరిగి, అంతే వేగంగా పడిపోతాయి. దీనివల్ల శరీరం వెంటనే అలసిపోయి నిద్రమత్తులోకి జారుకుంటుంది.
2. సిర్కాడియన్ రిథమ్
మన శరీరానికి ఒక సహజమైన కాలచక్రం ఉంటుంది. మధ్యాహ్నం సమయంలో శరీరం సహజంగానే కొంచెం చురుకుదనాన్ని తగ్గించుకుంటుంది. మీకు రాత్రి పూట సరిగ్గా నిద్ర పట్టకపోయినా లేదా నిద్రకు అంతరాయం కలిగినా, మధ్యాహ్నం వచ్చే ఈ నీరసం మరింత భయంకరంగా ఉంటుంది.
3. కదలకుండా కూర్చోవడం
భోజనం చేసిన వెంటనే గంటల తరబడి సీటుకే అతుక్కుపోవడం వల్ల రక్త ప్రసరణ, జీర్ణక్రియ మందగిస్తాయి. ఇది మిమ్మల్ని మరింత బద్ధకంగా మారుస్తుంది. అలాగే, శరీరంలో నీటి శాతం తగ్గడం వల్ల కూడా అలసట వస్తుంది.
ఈ నీరసాన్ని ఎలా తగ్గించుకోవాలంటే
మధ్యాహ్నం 2 గంటల నీరసం నుంచి బయటపడటానికి డాక్టర్లు ఈ సలహాలు ఇస్తున్నారు:
* మీ భోజనంలో ప్రోటీన్లు (పప్పులు, గుడ్లు), ఫైబర్ (కూరగాయలు), ఆరోగ్యకరమైన కొవ్వులు ఉండేలా చూసుకోండి.
*కార్బోహైడ్రేట్లు తగ్గించండి అంటే మధ్యాహ్నం మరీ ఎక్కువగా అన్నం లేదా స్వీట్లు తినకండి.
*భోజనం చేసిన తర్వాత కనీసం 10-15 నిమిషాల పాటు అటు ఇటు నడవండి.
*రోజంతా తగినంత నీరు తాగుతూ ఉండండి.
*రాత్రి పూట టైంకి నిద్రపోయే అలవాటు చేసుకోండి.
మధ్యాహ్నం వచ్చే నీరసం మీ బద్ధకం కాదు, అది మీ శరీరం ఇచ్చే ఒక సిగ్నల్. మీరు తినే ఆహారం, నిద్ర, అలవాట్లను కొంచెం మార్చుకుంటే, రోజంతా ఉత్సాహంగా ఉండవచ్చు!
