ఇంటికో ఉద్యోగం, నిరుద్యోగ భృతి నోటి మాటలేనా అని మంత్రి కేటీఆర్ను వైఎస్సార్టీపీ చీఫ్ వైఎస్ షర్మిల ప్రశ్నించారు. రాష్ట్రంలో లక్షా 91వేల 126 పోస్టులు ఖాళీగా ఉన్నాయని.. ప్రభుత్వ శాఖల్లో 39శాతం ఉద్యోగులే లేరని పీఆర్సీ కమిటీ చెప్పలేదా అని అడిగారు. గడిచిన 8 ఏండ్లలో 35లక్షల మంది నిరుద్యోగులున్నట్లు టీఎస్పీఎస్సీ లెక్కలే చెప్తున్నాయని ట్వీట్ చేశారు.
సెంటర్ ఫర్ మానిటరింగ్ ఇండియన్ ఎకానమీ ప్రకారం నిరుద్యోగంలో తెలంగాణ దక్షిణ భారతదేశంలోనే తొలిస్థానంలో ఉందని షర్మిల అన్నారు. ‘‘వినేటోడు ఎర్రిపప్ప ఐతే చెప్పేటోడు ఎర్రిమాటలు ఎన్నైనా చెప్తాడట. 80వేల పుస్తకాలు చదివిన మీ నాన్నకు, ఇలాంటి కబుర్లు చెప్పే నీకు సర్కార్ కొలువు ఇయ్యడం అంటే తెలుసా.. పని చేస్తునోళ్లను పర్మినెంట్ చేసి, కొత్త ఉద్యోగం అంటారా అని ట్వీట్ చేశారు.
2014 నుంచి ప్రభుత్వం ఇచ్చిన కొలువుల్లో కొత్త నౌకర్లెన్నని షర్మిల ప్రశ్నించారు. హామీల కంటే ఎక్కువే ఇచ్చినం అని చెప్పే పాలకుల డ్రామాలకు ఆస్కార్ అవార్డ్ ఇచ్చినా తక్కువేనన్నారు. మొదటిసారి 70వేలు, రెండోసారి 30వేల నోటిఫికేషన్లు ఇచ్చి, మొత్తం లక్ష ఉద్యోగాలు దాటముందే 2.25లక్షల ఉద్యోగాలు భర్తీ చేశామని పచ్చి అబద్దాలు చెప్తున్నారంటూ మండిపడ్డారు.
