హైదరాబాద్ సిటీ, వెలుగు: ఖాజాగూడ హెరిటేజ్ రాక్ ప్రాంత అభివృద్ధిపై సైబరాబాద్ మున్సిపల్ కమిషనర్ సృజన ప్రత్యేక దృష్టి సారించారు. శేరిలింగంపల్లి జోన్ కమిషనర్, యూబీడీ అడిషనల్ కమిషనర్, నార్సింగి, శేరిలింగంపల్లి డిప్యూటీ కమిషనర్లతో కలిసి శనివారం ఆమె ఈ ప్రాంతాన్ని సందర్శించారు. ఈ సందర్భంగా సేవ్ ది రాక్స్ సంస్థ సభ్యులు సంగీత, రుత్విక్ కమిషనర్తో కలిసి రాక్ వాక్ నిర్వహించారు. అక్కడి రాళ్ల చారిత్రక ప్రాధాన్యతను, ప్రత్యేక నిర్మాణాలను సభ్యులు వివరించారు.
దీంతో రాళ్ల పరిరక్షణతో పాటు ఈ ప్రాంతాన్ని సమగ్రంగా అభివృద్ధి చేయాలని అధికారులను కమిషనర్ ఆదేశించారు. హెచ్ఎండీఏ, హైడ్రా, సీఎంసీ సమన్వయంతో ఈ ప్రాంతాన్ని పచ్చదనంతో కూడిన రాక్ గార్డెన్గా మార్చాలని సూచించారు. ఖాజాగూడ సరస్సుతో అనుసంధానం చేస్తూ రాళ్ల చుట్టూ ఫెన్సింగ్ ఏర్పాటు చేయాలని, భౌగోళిక వివరాలను పరిశీలించి అవసరమైన అనుమతుల కోసం రెవెన్యూ శాఖ, రంగారెడ్డి జిల్లా కలెక్టర్తో సమన్వయం చేసుకోవాలని స్పష్టం చేశారు. ట్రెక్కింగ్, రాక్ క్లైంబింగ్ వంటి పర్యాటక వసతులతో కూడిన ప్రతిపాదనలు సిద్ధం చేయాలని ఆదేశించారు.
