- ప్రజల ఆకాంక్షల మేరకు రాష్ట్రంలో పాలన:ఎంపీ గడ్డం వంశీకృష్ణ
- గోదావరిఖనిలో తెలంగాణ తల్లి, కాకా విగ్రహాలకు నివాళులు
గోదావరిఖని, వెలుగు: తెలంగాణ రాష్ట్ర సాధనలో అమరులైన వారి ఆశయ సాధన కోసం రాష్ట్ర ప్రభుత్వం కృషి చేస్తోందని పెద్దపల్లి ఎంపీ గడ్డం వంశీకృష్ణ అన్నారు. రాష్ట్రంలో కాంగ్రెస్ అధికారంలోకి వచ్చిన తర్వాత ప్రజల ఆకాంక్షల మేరకు పాలన కొనసాగుతోందని పేర్కొన్నారు. తెలంగాణ రాష్ట్ర ఆవిర్భావ దినోత్సవం సందర్భంగా సోమవారం పెద్దపల్లి జిల్లా రామగుండం మండలం గోదావరిఖనిలోని జీఎం ఆఫీస్ సమీపంలో తెలంగాణ తల్లి, కాకా వెంకటస్వామి విగ్రహాలకు ఎంపీ వంశీకృష్ణ పూలమాలలు వేసి నివాళులర్పించారు. అనంతరం ఆయన మాట్లాడుతూ.. పదేండ్ల బీఆర్ఎస్ పాలనలో ప్రజలను మోసం చేశారని, ప్రజాధనం దుర్వినియోగం చేశారని ధ్వజమెత్తారు.
దివంగత నేత కాకా వెంకటస్వామి తెలంగాణ రాష్ట్ర ఏర్పాటు కోసం చేసిన కృషిని ఈ సందర్భంగా ఎంపీ గుర్తుచేశారు. తెలంగాణ ఉద్యమంలో తన తండ్రి, ప్రస్తుత చెన్నూరు ఎమ్మెల్యే గడ్డం వివేక్ వెంకటస్వామి క్రియాశీల పాత్ర పోషించారని, ఎంపీగా ప్రత్యేక రాష్ట్ర సాధన కోసం రైలురోకో చేసి జైలుకు వెళ్లారని, పార్లమెంట్లో ధర్నా చేశారని వివరించారు. తెలంగాణ ఉద్యమంతో తన తాత, తండ్రికి విడదీయలేని అనుబంధం ఉందన్నారు. కొట్లాడి సాధించుకున్న తెలంగాణ అన్ని రంగాల్లో అభివృద్ధి సాధించేందుకు తాను కృషి చేస్తానన్నారు. ఈ కార్యక్రమంలో కాంగ్రెస్ లీడర్లు పి.మల్లికార్జున్, పాకాల గోవర్ధన్ రెడ్డి, కామ విజయ్, మల్లేశ్యాదవ్, జీన్స్, సంజీవ్, నర్సింగ్ దొర, జావిద్, గడ్డం మధు, నరేందర్ రెడ్డి తదితరులు పాల్గొన్నారు.
