- తీవ్ర గాయాలతో అక్కడికక్కడే చనిపోయిన చిన్నారి
శంషాబాద్, వెలుగు : నాలుగేండ్ల బాలుడిపై నుంచి ఆటో దూసుకెళ్లగా.. ఆ చిన్నారి చనిపోయాడు. ఈ ఘటన మైలార్ దేవ్ పల్లి పీఎస్ పరిధిలో జరిగింది. పోలీసులు తెలిపిన వివరాల ప్రకారం.. మధ్యప్రదేశ్కు చెందిన బినీత్ కుమార్ కోల్ తన కుటుంబంతో కలిసి బతకుదెరువు కోసం సిటీకి వచ్చి మైలార్దేవ్పల్లిలోని మధుబన్ కాలనీలో ఉంటున్నాడు. కాటేదాన్ ఇండస్ట్రియల్ ఏరియాలో పనిచేస్తున్నాడు. అతడికి ఇద్దరు కూతుళ్లు, ఇద్దరు కొడుకులు ఉన్నారు. శనివారం ఉదయం బినీత్ చిన్న కొడుకు వికాస్ కుమార్(4) ఇంటి ముందు ఆడుకుంటున్నాడు. ఈ క్రమంలో ప్రమాదవశాత్తు కిందపడిపోగా.. అటువైపుగా వస్తున్న ట్రాలీ ఆటో చిన్నారిపై నుంచి దూసుకెళ్లింది. తీవ్రంగా గాయపడ్డ వికాస్ కుమార్ అక్కడికక్కడే మృతి చెందాడు. ఘటనా స్థలానికి చేరుకున్న పోలీసులు కేసు ఫైల్ చేశారు.
పేట్ బషీరాబాద్లో బీటెక్ స్టూడెంట్..
జీడిమెట్ల : వెహికల్ ఢీకొని బీటెక్ స్టూడెంట్ చనిపోయిన ఘటన పేట్ బషీరాబాద్ పీఎస్ పరిధిలో జరిగింది. పోలీసులు తెలిపిన వివరాల ప్రకారం.. జగిత్యాల జిల్లా కోరుట్లకు చెందిన జోగినపల్లి రోహిత్ రావు(20) సిటీకి వచ్చి మేడ్చల్లోని హాస్టల్లో ఉంటూ ఓ కాలేజీలో బీటెక్ చదువుతున్నాడు. శుక్రవారం రాత్రి తన ఫ్రెండ్ సంతోష్తో కలిసి మేడ్చల్ నుంచి అల్వాల్కు బైక్పై వెళ్తున్నాడు. ఓ వెహికల్ వీరి బైక్ ను ఢీకొట్టడంతో తీవ్రంగా గాయపడ్డ రోహిత్ రావు అక్కడికక్కడే మృతి చెందాడు. సంతోష్కు సైతం గాయాలు కాగా.. అతడిని హాస్పిటల్ కు తరలించారు. పోలీసులు కేసు ఫైల్ చేసి దర్యాప్తు చేస్తున్నారు.
