వాషింగ్టన్: నెల రోజుల పసికందును ఉయ్యాలకు బదులు.. పొరపాటున ఓవెన్లో వేసింది కన్న తల్లి.. దీంతో ఆ చిన్నారి ప్రాణాలు కోల్పోయింది. ఆదివారం అమెరికాలోని కాన్సాస్ సిటీలో ఈ ఘోరం చోటుచేసుకుంది. పసికందు ఊపిరి పీల్చుకోవడంలేదంటూ ఎమర్జెన్సీ సర్వీసుకు ఫోన్ చేయడంతో పోలీసులు స్పాట్కు చేరుకున్నారు.
కాలిన గాయాలతో ఆ చంటిబిడ్డ ప్రాణాలు కోల్పోయినట్లు గుర్తించారు. మృతురాలి తల్లి మరియా థామస్(26)ను విచారించిన తర్వాత వివరాలు వెల్లడించారు. బిడ్డను నిద్రపుచ్చేందుకు ఉయ్యాలలో వేసేందుకు బదులు పొరపాటున ఓవెన్లో పడుకోబెట్టినట్లు మరియా చెప్పిందన్నారు. నిందితురాలిపై కేసు నమోదు చేసినట్లు తెలిపారు. కాలిపోయిన పసికందు బట్టలు, దుప్పటిని స్వాధీనం చేసుకున్నామన్నారు. ఈ ఘటనకు తల్లి మరియా మానసిక స్థితి కూడా కారణం అయ్యుండొచ్చని ఆమె స్నేహితురాలు పేర్కొన్నారు.
