ఎల్బీనగర్, వెలుగు : కారు డ్రైవర్ నిర్లక్ష్యంతో మూడేండ్ల చిన్నారి అక్కడికక్కడే చనిపోయింది. హయత్ నగర్ పోలీసులు తెలిపిన వివరాల ప్రకారం.. వనస్థలిపురం బీఎన్రెడ్డి నగర్లోఉండే రాజు, కవిత దంపతులకు కొడుకు బసవరాజు(6), కూతురు లక్ష్మి(3) ఉన్నారు. రాజు, కవిత హయత్నగర్లోని లెక్చరర్స్ కాలనీలో నిర్మాణంలో ఉన్న ఓ భవనం వద్ద పనిచేస్తున్నారు.
బుధవారం కవిత తన కూతురు లక్ష్మిని ఆ భవనం వద్ద పడుకోబెట్టి పనులు చేస్తుండగా.. అటుగా వచ్చిన ఓ కారు డ్రైవర్ వెహికల్ను రివర్స్ చేస్తూ నిద్రపోతున్న చిన్నారి తలపై నుంచి పోనిచ్చాడు. తీవ్రంగా గాయపడ్డ బాలికను వెంటనే ఆస్పత్రికి తరలించగా అప్పటికే చనిపోయినట్లు డాక్టర్లు నిర్ధారించారు. తల్లి ఫిర్యాదు మేరకు కేసు నమోదు చేసిన పోలీసులు దర్యాప్తు చేస్తున్నారు.
