చందానగర్, వెలుగు: కల్లు కాంపౌండ్ వద్ద జరిగిన గొడవలో ఓ యువకుడిని ఇద్దరు వ్యక్తులు విచక్షణా రహితంగా కొట్టి చంపిన ఘటన చందానగర్ పోలీస్ స్టేషన్ పరిధిలో జరిగింది. పోలీసులు తెలిపిన ప్రకారం.. వికారాబాద్ జిల్లా తాండూర్ మండలం సిరిగిరిపేట్ గ్రామానికి చెందిన మాసాన్పల్లి రామచందర్, పసుపు అమరేశ్(23) నగరానికి వలస వచ్చి లింగంపల్లిలో ర్యాపిడో నడుపుకుంటున్నారు. రాత్రివేళలో లింగంపల్లి రైల్వే స్టేషన్ ప్లాట్ఫాంపై పడుకుంటూ పనులు చేసుకుంటున్నారు.
మంగళవారం రాత్రి రైల్వే స్టేషన్ సమీపంలోని కల్లు కాంపౌండ్ కు వెళ్లారు. అక్కడే ఉన్న ఓ మహిళ అమరేశ్తో గొడవ పడ్డది. పక్కనే ఉన్న మరో మహిళ ఇద్దరు వ్యక్తులకు అక్కడికి పిలిపించింది. వెంటనే ఇద్దరు యువకులు అక్కడికి వచ్చి అమరేశ్పై దాడి చేయగా స్పృహ తప్పి పడిపోయాడు. 108 సిబ్బంది అక్కడికి చేరుకుని పరీక్షించగా అప్పటికే మృతిచెందినట్లు గుర్తించారు. నిందితులు చందానగర్ పోలీసుల అదుపులో ఉన్నట్లు సమాచారం.
