న్యూఢిల్లీ: ఆమ్ ఆద్మీ పార్టీ ఢిల్లీ మున్సిపల్ కార్పొరేషన్ మేయర్, డిప్యూటీ మేయర్ అభ్యర్థుల పేర్లను ఖరారు చేసింది. మేయర్ అభ్యర్థిగా షెల్లీ ఒబెరాయ్, డిప్యూటీ మేయర్ అభ్యర్థిగా ఆప్ ఎమ్మెల్యే షోయబ్ ఇక్బాల్ కుమారుడు ఆలే మొహమ్మద్ ఇక్బాల్ను ఎంపిక చేసింది. ఆప్ సీనియర్ నేత పంకజ్ గుప్తా శుక్రవారం మీడియా సమావేశంలో వారి పేర్లను ప్రకటించారు. డిసెంబర్ 7న జరిగిన ఎంసీడీ ఎన్నికల్లో ఆమ్ ఆద్మీ పార్టీ.. 134 స్థానాల్లో గెలుపొంది తొలిసారి మేయర్ పీఠాన్ని కైవసం చేసుకుంది. అలాగే, ఎంసీడీ ఎన్నికల్లో ఫస్ట్టైం పోటీచేసి విజయం సాధించిన షెల్లీ ఒబెరాయ్ మేయర్ పోస్ట్ను దక్కించుకున్నారు.
ఢిల్లీ అభివృద్ధే లక్ష్యం: షెల్లీ ఒబెరాయ్
ఢిల్లీ అభివృద్ధికి కౌన్సిలర్లందరితో కలిసి పనిచేయడమే తమ లక్ష్యమని షెల్లీ ఒబెరాయ్ తెలిపారు. ఇప్పటికే కౌన్సిలర్లు వార్డుల్లో పనులు ప్రారంభించారన్నారు. పరిశుభ్రత, నగరంలో చెత్త సమస్యను పరిష్కరించడంపై మెయిన్ ఫోకస్ ఉంటుందన్నారు. 39 ఏండ్ల ఒబెరాయ్.. ఢిల్లీ బీజేపీ మాజీ అధ్యక్షుడు ఆదేశ్ గుప్తా సొంత గడ్డగా అయిన ఈస్ట్ పటేల్ నగర్ వార్డు నుంచి గెలిచారు.
