- దేశంలో హింసకు పాల్పడుతున్నది: ఆప్ ఎంపీ సంజయ్సింగ్
ముషీరాబాద్, వెలుగు: స్వార్థ రాజకీయ ప్రయోజనాల కోసం దేశంలో బీజేపీ హింసాత్మక వాతావరణం సృష్టిస్తున్నదని ఆప్ ఎంపీ సంజయ్ సింగ్ ఆరోపించారు. బీజేపీ.. అతిపెద్ద దుష్టశక్తి అని మండిపడ్డారు. లౌకిక ప్రజాతంత్రవాదులంతా ఏకమై బీజేపీని తరిమికొట్టాలని పిలుపునిచ్చారు. హైదరాబాద్లోని పార్టీ స్టేట్ ఆఫీస్లో బుధవారం ఆప్ వాలంటీర్ల సదస్సు జరిగింది. ఈ సదస్సుకు ఆయన చీఫ్ గెస్ట్గా హాజరై మాట్లాడారు. ‘‘మణిపూర్లో ఇప్పటికీ హింస కొనసాగుతున్నది.
అయినా, మోదీ ప్రభుత్వం ఒక్క కామెంట్ చేయడం లేదు. ఎందుకు సైలెంట్గా ఉంది? మణిపూర్లో బీజేపీ అధికారంలో ఉన్నప్పటికీ శాంతి స్థాపనలో విఫలమైంది. కార్పొరేట్ ఫ్రెండ్స్ కోసమే ప్రధాని మోదీ పని చేస్తున్నారు. పేదల డబ్బులను ఆయన దోస్తులకు దోచిపెడ్తున్నడు. పదేండ్ల పాలనలో అదానీ, అంబానీకి దేశ వనరులన్నీ అప్పజెప్పిండు’’అని సంజయ్ సింగ్ విమర్శించారు.
