రాజ్యసభకు వృద్ధుడి నామినేషన్

V6 Velugu Posted on May 14, 2022

హైదరాబాద్, వెలుగు: ఫుడ్ ప్రాసెసింగ్ పార్కు కోసం తన భూమిని అన్యాయంగా గుంజుకుంటున్నారంటూ మహబూబ్​నగర్​కు చెందిన వృద్ధుడు రాజ్యసభకు నామినేషన్ వేసేందుకు సిద్ధమయ్యారు. అసెంబ్లీ ఆఫీస్​లో శుక్రవారం తీన్మార్ మల్లన్నతో కలిసి హన్వాడకు చెందిన దళితుడు చిన్న మాసయ్య నామినేషన్ పేపర్లు తీసుకున్నారు. ఈ సందర్భంగా చిన్న మాసయ్య మీడియాతో మాట్లాడారు. “సీఎం కేసీఆర్, మంత్రి శ్రీనివాస్ గౌడ్​లు తమకున్న కొంత భూమిని ఫుడ్ ప్రాసెసింగ్ పార్కు కోసం గుంజుకుని.. నానా కష్టాల పాలు చేస్తున్నారు. దీనిపై కోర్టులో కూడా పిటిషన్ వేసినం. ప్రాణం పోయినా.. భూమి ఇయ్యబోము. దొరల కాలంలో బాంచెన్​బతుకు బతికినం.. ఇప్పుడు సీఎం కేసీఆర్​ను నమ్మి ఓటు వేసినందుకు తమకు దక్కుతున్నది ఇదేనా?’’ అని ప్రశ్నించారు. తన గోడు ఎవరు పట్టించుకోకపోవడంతోనే అసెంబ్లీకి వచ్చి రాజ్యసభ నామినేషన్​ పత్రాలు తీసుకుంటున్నట్లు ఆయన చెప్పారు. ఫుడ్​ ప్రాసెసింగ్ పార్క్​పేరుతో మాసయ్యతో పాటు మరో 2వేల మంది దళితుల భూములను ప్రభుత్వం బలవంతంగా గుంజుకుంటున్నదని తీన్మార్‌‌ మల్లన్న ఆరోపించారు. న్యాయం కోసం నామినేషన్ వేసేందుకు సిద్ధమైన మాసయ్యకు ప్రతిపక్ష బీజేపీ, కాంగ్రెస్ ఎమ్మెల్యేలు మద్దుతు ఇవ్వాలని కోరారు.

Tagged Nomination, old man, Rajyasaba, Food processing park Land, Masaya

Latest Videos

Subscribe Now

More News