- 14 వేల మందిని సేఫ్ ప్లేస్కు తరలింపు.. బాంబును డిఫ్యూజ్ చేసిన సైన్యం
వార్సా: పోలెండ్ లో రెండో ప్రపంచ యుద్ధ కాలం నాటి భారీ పేలని బాంబు బయటపడింది. దీంతో ఆ ఏరియా నుంచి వేలమందిని సురక్షిత ప్రాంతాలకు తరలించారు. పోలెండ్లోని లుబ్లిన్ సిటీలో గురువారం ఓ బిల్డింగ్ పిల్లర్ల కోసం తవ్వుతుండగా దాదాపు 250 కిలోల భారీ పేలని బాంబు బయటపడింది. కార్మికులు వెంటనే పోలీసులు, ఆర్మీకి సమాచారం ఇచ్చారు. ఆర్మీ అధికారులు ఆ ఏరియాను తమ కంట్రోల్లోకి తీసుకున్నారు.
శుక్రవారం సాయంత్రం వరకు ఆ ఏరియా నుంచి 14 వేలకు పైగా మందిని సురక్షిత ప్రాంతాలకు తరలించామని లుబ్లిన్ టౌన్హాల్అధికార ప్రతినిధి కటర్జ్యాన డ్యూమా తెలిపారు. బాంబు గుర్తించిన ప్రాంతానికి వెళ్లే రోడ్లు క్లోజ్ చేశామని, గ్యాస్, పవర్, నీటి సరఫరాను ఆపేసినట్లు చెప్పారు. మిలటరీ ఇంజనీర్లు బాంబును డిప్యూజ్ చేస్తున్నారని తెలిపారు. బాంబు బయటపడిన ప్రాంతంలో రెండో ప్రపంచ యుద్ధ సమయంలో విమానాల తయారీ ఫ్యాక్టరీ, ఎయిర్పోర్ట్ ఉండేవని చెప్పారు. దీని టార్గెట్గా అప్పటి జర్మన్ నాజీలు పెద్ద సంఖ్యలో బాంబ్లు వేశారన్నారు.
అలాగే దీన్ని స్వాధీనం చేసుకొన్న తర్వాత జైలుగా, లేబర్ క్యాంపుగా మార్చారని డ్యూమా తెలిపారు. ఆ ప్రాంతంలో ఇలా పేలని బాంబులు గతంలో కూడా బయటపడినట్లు చెప్పారు.
