హైదరాబాద్, వెలుగు: రాష్ట్రంలో మరో ఎన్నికల సందడి మొదలైంది. మునుగోడు అసెంబ్లీ స్థానానికి త్వరలోనే ఎన్నికలు జరగనుండగా, మహబూబ్‌‌నగర్‌– రంగారెడ్డి– హైదరాబాద్ టీచర్ సెగ్మెంట్ఎమ్మెల్సీ ఎన్నిక వచ్చే ఏడాది మార్చిలో జరగనుంది. ప్రస్తుత ఎమ్మెల్సీ కాటేపల్లి జనార్దన్రెడ్డి పదవీకాలం వచ్చే ఏడాది మార్చి29తో ముగియనున్నందున ఆలోపు ఎన్నికల ప్రక్రియ పూర్తి చేయాల్సి ఉంది. దీంతో ఆదివారం నుంచే ఓటర్ల నమోదు మొదలుకావడంతో టీచర్లలో హడావుడి షురువైంది. వచ్చేనెల 7 వరకూ ఓటర్ల నమోదు చేపట్టి, డిసెంబర్ 30న తుది ఓటర్ల జాబితాను ప్రకటించనున్నట్లు ఎన్నికల కమిషన్ వెల్లడించింది. ఈ సారి 25 వేల మంది టీచర్ ఓటర్లు నమోదయ్యే అవకాశముందని అంచనా వేస్తున్నారు. జనరల్ ఎన్నికలకు టైమ్ దగ్గరగా ఉండటంతో ఈ టీచర్ ఎమ్మెల్సీ ఎన్నికనూ అన్ని పార్టీలు ప్రతిష్టాత్మకంగా తీసుకోనున్నాయి. అభ్యర్థులకు అన్ని పార్టీలు బహిరంగంగానే మద్దతు ప్రకటించే అవకాశముంది.
పోటీకి చాలామంది రెడీ
ఎమ్మెల్సీ ఎన్నిక బరిలో పీఆర్టీయూ, టీఎస్యూటీఎఫ్, ఎస్టీయూటీఎస్, తపస్ తదితర సంఘాలు పోటీలో ఉండేందుకు ఏర్పాట్లు చేసుకుంటున్నాయి. టీఆర్ఎస్ మద్దతుతో సిట్టింగ్ ఎమ్మెల్సీ జనార్దన్రెడ్డి పీఆర్టీయూ నుంచి మరోసారి బరిలో నిలిచేందుకు ప్రయత్నాలు చేస్తున్నారు. గత ఎమ్మెల్సీ ఎన్నికల్లో రెండోస్థానంలో నిలిచిన టీఎస్యూటీఎఫ్ రాష్ట్ర నాయకుడు మాణిక్రెడ్డి ఈసారి కూడా పోటీ చేసే అవకాశముంది. మరోపక్క ఎస్టీయూటీఎస్ తరపున మాజీ రాష్ట్ర అధ్యక్షుడు భుజంగరావు బరిలో నిలిచేందుకు ఆ సంఘం ఏర్పాట్లు చేస్తోంది. అయితే యూటీఎఫ్ నాయకత్వంలో ఉపాధ్యాయ సంఘాల పోరాట కమిటీ, ఎస్టీయూటీఎస్ నేతృత్వంలో జాక్టో టీచర్ల సమస్యలపై పోరాటాలు నిర్వహిస్తున్నాయి. ఈ రెండు సంఘాలూ ఆయా జేఏసీల్లోని సంఘాలతో చర్చలు జరుపుతున్నాయి. బీజేపీ మద్దతుతో తపస్ తరపున పోటీ చేసేందుకు వెంకట్ రెడ్డి, ఏవీఎన్ రెడ్డి ప్రయత్నాలు చేస్తున్నారు. బీసీ సంఘాల తరపున విజయ్ కుమార్ పోటీకి రెడీ అవుతున్నారు.
జనార్దన్రెడ్డికి టికెట్ దక్కేనా?
ఇప్పటికే రెండు సార్లు ఎమ్మెల్సీగా గెలిచిన జనార్దన్ రెడ్డికి ఈ సారి గట్టి పోటీ ఎదురవుతోంది. టీఆర్ఎస్ కు పూర్తిగా అనుబంధంగా మారి పనిచేయడం, వరుసగా రెండోసారి ఎమ్మెల్సీగా కొనసాగుతుండటంతో టీచర్ల నుంచి వ్యతిరేకత వస్తోంది. పీఆర్టీయూ రాష్ట్ర నాయకత్వం కూడా కొత్త వారికి చాన్స్ ఇవ్వాలనే యోచనలో ఉంది. కానీ, ఆ సెగ్మెంట్ పరిధిలోని 9 జిల్లాల అధ్యక్ష, కార్యదర్శులు జనార్దన్రెడ్డికి సీటు ఇవ్వాలని రాష్ట్ర కమిటీకి లెటర్ పెట్టినట్టు తెలిసింది. అయితే, సంఘం బైలా ప్రకారం 33 జిల్లాల అధ్యక్ష, కార్యదర్శుల మీటింగ్లో అభ్యర్థిని ప్రకటించాలని రాష్ట్ర నాయకత్వం నిర్ణయించింది. పీఆర్టీయూ నుంచి ఆ సంఘం మాజీ రాష్ట్ర ప్రధాన కార్యదర్శి చెన్నకేశవరెడ్డి కూడా టికెట్ కోసం ప్రయత్నిస్తుండటంతో ఈ ఇద్దరిలో కేసీఆర్ ఎవరిపేరు సూచిస్తే.. వారికే పీఆర్టీయూ మద్దతిచ్చే అవకాశముంది.
