న్యూఢిల్లీ: రష్యా, ఉక్రెయిన్‌ యుద్ధంలో రష్యా తరఫున పోరాడుతూ మరో భారతీయుడు మృతిచెందాడు. హర్యానాకు చెందిన రవి మౌన్ (22) అనే యువకుడు యుద్ధంలో మరణించినట్టు అతని కుటుంబ సభ్యులు తెలిపారు. ఈ యుద్ధంలో ఇప్పటి వరకు రవి మౌన్సహా ఐదుగురు భారతీయులు మరణించినట్టు స్థానిక మీడియా తెలిపింది. రవి మౌన్కు ఓ ప్రైవేట్ రిక్రూట్‌మెంట్ ఏజెంట్ ట్రాన్స్‌పోర్ట్‌లో ఉద్యోగం ఇస్తామని హామీ ఇవ్వడంతో అతడు ఈ ఏడాది జనవరిలో రష్యాకు వెళ్లినట్టు మృతుడి సోదరుడు అజయ్తెలిపారు.
అతడు అక్కడికి వెళ్లిన తర్వాత ఆయుధ శిక్షణ ఇచ్చారని, మార్చిలో ఉక్రెయిన్‌తో సరిహద్దులో జరిగే పోరాటంలో అతన్ని చేర్చారని పేర్కొన్నారు. అతనితో కాంటాక్ట్ కోల్పోయిన తరువాత తాను మాస్కోలోని భారత రాయబార కార్యాలయాన్ని సంప్రదించానని.. వారు రవి మౌన్ మరణించినట్టు తమకు తెలిపారని అజయ్ చెప్పారు. రవి ఒకసారి యుద్ధం నుంచి తిరిగి వచ్చినా మళ్లీ పోరాటానికి తీసుకెళ్లారని ఆయన వెల్లడించారు. కాగా, తమ సోదరుడి డెడ్బాడీని భారత్‌కు తీసుకురావడానికి సహకరించాలని కుటుంబ సభ్యులు ప్రధాని నరేంద్ర మోదీకి విజ్ఞప్తి చేశారు.
