హైదరాబాద్, వెలుగు: తెలంగాణ ఉద్యమంలో 1400 మంది చనిపోవడానికి కారణమైన కాంగ్రెస్.. ప్రధాని మోదీని విమర్శించడం విడ్డూరంగా ఉందని బీజేపీ జాతీయ ప్రధాన కార్యదర్శి, ఎంపీ బండి సంజయ్ అన్నారు. స్క్రిప్ట్ రైటర్ను మార్చుకోండి పప్పూజీ అంటూ రాహుల్ గాంధీని ఉద్దేశించి ట్వీట్ చేశారు. తెలంగాణకు మీ ముత్తాత నుంచి ఇప్పటి వరకు మోసం చేశారని రాహుల్పై మండిపడ్డారు. వందలాది మంది అమరవీరుల మరణానికి కారణమైనందుకు మీరు, మీ కుటుంబ సభ్యులు ఎన్నిసార్లు క్షమాపణలు చెప్పాలి? అని బండి సంజయ్ ప్రశ్నించారు.
ఇందిరా గాంధీ - ప్రభుత్వం కారణంగా 1969లో దాదాపు 369 మంది ప్రాణాలు కోల్పోయారని వివరించారు. సోనియా 2009లో తెలంగాణ ప్రకటించి ఆ తర్వాత వెనక్కి తగ్గారని చెప్పారు. 1400 మంది ప్రాణాలను బలిగొన్న తర్వాత కాంగ్రెస్ తెలంగాణ బిల్లును ప్రవేశపెట్టిందని సంజయ్ పేర్కొన్నారు.
మహిళా బిల్లు బీజేపీ చిత్తశుద్ధికి నిదర్శనం
మహిళా బిల్లు బీజేపీ చిత్తశుద్ధికి నిదర్శనమని బండి సంజయ్ అన్నారు. ఈ సందర్భంగా ఆయన ప్రధానికి థ్యాంక్స్ చెప్పారు. కాంగ్రెస్ ద్వంద్వ వైఖరీ వల్ల మూడు దశాబ్దాలుగా బిల్లు ఆమోదానికి నోచుకోలేదని ఆరోపించారు.