- స్టేట్ ఎంక్వైరీ ఆఫీసర్గా లక్ష్మీదేవి, జిల్లా ఆఫీసర్గా నాగలక్ష్మి
యాదాద్రి, వెలుగు : ఇద్దరు టెన్త్ స్టూడెంట్ల ఆత్మహత్యపై ఏకకాలంలో దర్యాప్తు మొదలైంది. పోలీసులు ఒకవైపు ఎంక్వయిరీ కొనసాగిస్తుండగా.. జిల్లాలో శాఖాపరమైన దర్యాప్తు కూడా మొదలైంది. స్టేట్ లెవెల్లో ఎంక్వైరీ ఆఫీసర్గా మహిళా శిశు సంక్షేమ జాయింట్ డైరెక్టర్ కేఆర్ఎస్ లక్ష్మీదేవిని నియమిస్తూ మంత్రి సీతక్క ఆదేశాలు జారీ చేశారు. అలాగే జిల్లా ఎంక్వయిరీ ఆఫీసర్ గా స్పెషల్ డిప్యూటీ కలెక్టర్ నాగలక్ష్మిని నియమించారు. మరోవైపు హాస్టల్ వార్డెన్ శైలజపై వేటు వేస్తూ నిర్ణయం తీసుకున్నారు.
ఈనెల 3 రాత్రి భువనగిరి ఎస్సీ హాస్టల్ లో టెన్త్ స్టూడెంట్లు కోడి భవ్య, గాదె వైష్ణవి ఆత్మహత్య చేసుకున్న విషయం తెలిసిందే. మూడు రోజులు గడిచినా బాలికల సూసైడ్కు కారణాలు ఇంకా వెల్లడించలేదు. దర్యాప్తు చేస్తున్నామని పోలీసులు చెబుతున్నారు. రోజురోజుకు అనుమానాలు పెరుగుతుడడంతో ఈ సంఘటనపై రాజకీయ పార్టీలు, విద్యార్థి సంఘాలు ఆందోళన చేస్తున్నాయి. ఈ నేపథ్యంలో జిల్లాలో శాఖాపరమైన దర్యాప్తుకు ప్రభుత్వం ఆదేశించింది. కాగా, బాలికలు ఆత్మహత్య చేసుకున్న స్థలంలో లభ్యమైనట్టు చెబుతున్న సూసైడ్ లెటర్ను ఫోరెన్సిక్ ల్యాబ్కు పోలీసులు పంపించారు. లెటర్తో పాటు స్టూడెంట్ల నోట్ బుక్స్ను కూడా పంపించారు.
ALSO READ : ముంచుకొస్తున్న తాగునీటి గండం
