కొత్తకోట, వెలుగు: వనపర్తి జిల్లా కొత్తకోట మున్సిపల్ ఆఫీసుకు బీజేపీ కౌన్సిలర్ భరత్ భూషణ్ తాళం వేసి ఆందోళనకు దిగారు. 11వ వార్డులో కనీస సౌలతులు కల్పించడం లేదని ఆరోపిస్తూ మున్సిపల్ ఆఫీస్ తాళం తీయనివ్వకుండా మంగళవారం నిరసన దీక్ష చేపట్టారు. మున్సిపల్ సిబ్బందిని ఆఫీసులోకి వెళ్లకుండా అడ్డుకున్నారు. ఈ సందర్భంగా కౌన్సిలర్ భరత్ భూషణ్ మాట్లాడుతూ.. 11వ వార్డులో హైమాస్ట్ లైట్లు ఏర్పాటు చేయాలని మున్సిపల్ కమిషనర్కు విజ్ఞప్తి చేసినా పట్టించుకోలేదని చెప్పారు. వార్డుకు వచ్చిన లైట్లను మున్సిపల్ చైర్పర్సన్ సుఖేషిని జోక్యం చేసుకొని మరో వార్డులో వేయించారని ఆరోపించారు.
ఎన్నికల్లో గెలిచి మూడేండ్లైనా తన వార్డులో అభివృద్ధి జరగకుండా మున్సిపల్ చైర్పర్సన్ కుట్ర చేస్తున్నారని ఆవేదన వ్యక్తం చేశారు. బీఆర్ఎస్కు చెందిన కౌన్సిలర్ల వార్డులను డెవలప్ చేస్తూ బీజేపీ కౌన్సిలర్లు ఉన్న వార్డులను పట్టించుకోవడం లేదన్నారు. బీజేపీ కౌన్సిలర్లు ఉన్న వార్డుల్లో అభివృద్ధి పనులు జరిగేంతవరకు మున్సిపల్ ఆఫీస్ తాళం తీయనివ్వమని పేర్కొన్నారు. కమిషనర్ శ్రీనివాసులు అక్కడికి చేరుకొని కౌన్సిల్ మీటింగ్లో నిలదీసి పనులు చేయించుకోవాలని సూచించారు. ఇలా ఆఫీస్కు తాళం వేయడం సరి కాదన్నారు. వార్డులో అభివృద్ధి పనులు చేయించే బాధ్యత తీసుకుంటానని కమిషనర్ హామీ ఇవ్వడంతో ఆందోళన విరమించారు. బీజేపీ కౌన్సిలర్ నవీన్రెడ్డి, బీజేపీ నాయకులు ఎస్.వెంకట్రెడ్డి, మన్యం యాదవ్, అమరేందర్రెడ్డి పాల్గొన్నారు.
