- సీవీఆర్ కాలేజీ నుంచి 10 లక్షలు డిమాండ్ చేశాడని ఆరోపణలు
గండిపేట, వెలుగు: బీఆర్ఎస్ విద్యార్థి సంఘం(బీఆర్ఎస్వీ) స్టేట్ సెక్రటరీ నాగారపు ప్రశాంత్ ను నార్సింగి పోలీసులు అరెస్ట్ చేశారు. సిటీలోని సీవీఆర్ ఇంజినీరింగ్ కాలేజీ మేనేజర్ శ్రీపతి నారాయణరెడ్డి నార్సింగిలో నివాసం ఉంటున్నాడు.
ప్రశాంత్ మరో పది మంది అనుచరులతో కలిసి ఇటీవల నారాయణరెడ్డి ఇంటికి వెళ్లాడని పోలీసులు తెలిపారు. తెలిసినవారికి అడ్మిషన్లు ఇవ్వడంతోపాటు తనకూ రూ. 10 లక్షలు ఇవ్వాలని ప్రశాంత్ డిమాండ్ చేసినట్లు వివరించారు. దాంతో ఈ నెల 16న సీవీఆర్ కాలేజీ మేనేజర్ నారాయణరెడ్డి నార్సింగి స్టేషన్ లో ఫిర్యాదు చేశాడన్నారు. ఈ మేరకు కేసు నమోదు చేసుకుని గురువారం ప్రశాంత్ను అదుపులోకి తీసుకున్నామని నార్సింగి పోలీసులు చెప్పారు. అతడిని రాజేంద్రనగర్ కోర్టులో హాజరుపరచగా కోర్టు.. 24 రోజుల పాటు రిమాండ్ విధించింది.
