న్యూఢిల్లీ, వెలుగు: ప్రకృతి విపత్తు వల్ల ఒక్కరు కూడా ప్రాణాలు కోల్పోకుండా ఉండాలన్నదే కేంద్ర ప్రభుత్వ ఉద్దేశమని కేంద్ర హోం మంత్రి అమిత్ షా స్పష్టం చేశారు. ఇందులో భాగంగా దేశంలో విపత్తు నిర్వహణ కోసం రూ. 8 వేల కోట్లు కేటాయించనున్నట్లు ప్రకటించారు. మంగళవారం ఢిల్లీలోని విజ్ఞాన్ భవన్ లో రాష్ట్రాలు/కేంద్రపాలిత ప్రాంతాల విపత్తు నిర్వహణ మంత్రులతో జరిగిన సమావేశంలో అమిత్ షా 3 పథకాలకు సంబంధించిన వివరాలను వెల్లడించారు.
రాష్ట్రాల్లో అగ్నిమాపక సేవల విస్తరణ, ఆధునీకరణకు రూ.5 వేల కోట్లు కేటాయిస్తామని చెప్పారు. మెట్రోపాలిటన్ సిటీలైన హైదరాబాద్తో పాటు ముంబై, చెన్నై, కోల్‌‌కతా, బెంగళూరు, అహ్మదాబాద్, పుణెలో వరదల ప్రమాదాన్ని తగ్గించడానికి రూ.2,500 కోట్లు ఇస్తామని తెలిపారు. నేషనల్ ల్యాండ్‌‌స్లైడ్ రిస్క్ మిటిగేషన్ ప్రాజెక్ట్ కింద 17 రాష్ట్రాలు/కేంద్ర పాలిత ప్రాంతాలకు రూ.825 కోట్లు కేటాయించనున్నట్లు వెల్లడించారు. దేశంలో విపత్తుల స్వభావం మారిందని, వాటి ఫ్రీక్వెన్సీ, తీవ్రత కూడా పెరిగిందని అమిత్షా అన్నారు. అనేక చోట్ల కొత్త విపత్తులు ఎదురవుతున్నాయని, వాటిని ఎదుర్కొనేందుకు సిద్ధంగా ఉండాలని సూచించారు.
