శంషాబాద్, వెలుగు: హోటళ్లలో రూమ్లు తీసుకుని క్రికెట్ మ్యాచ్లపై ఆన్ లైన్ బెట్టింగ్లకు పాల్పడుతున్న ఇద్దరిని శంషాబాద్ జోన్ ఎస్వోటీ పోలీసులు అరెస్ట్ చేశారు. బుధవారం డీసీపీ నారాయణ రెడ్డి వివరాలు వెల్లడించారు. ఏపీలోని భీమవరానికి చెందిన సురేశ్, జగదీశ్(32) ఇద్దరూ సిటీలో ఉంటూ ఐపీఎల్ మ్యాచ్లపై బెట్టింగ్ నిర్వహిస్తున్నారు. శంషాబాద్లోని మధురానగర్లో ఉన్న డీఎస్ఆర్ హోటల్లో రూమ్ రెంట్కు తీసుకున్నారు.మంగళవారం రాత్రి జరిగిన సన్రైజర్స్ హైదరాబాద్ వర్సెస్ ముంబయి ఇండియన్స్ మ్యాచ్పై బెట్టింగ్ నిర్వహించారు.
సమాచారం అందుకున్న పోలీసులు హోటల్పై దాడులు చేశారు. సబ్ బుకీ జగదీశ్ను అదుపులోకి తీసుకున్నారు. రూ.24 లక్షల క్యాష్, 5 సెల్ ఫోన్లు, సామగ్రిని స్వాధీనం చేసుకున్నారు. అకౌంట్ లోని రూ.4 లక్షలను ఫ్రీజ్ చేశారు. మెయిన్ బుకీ సురేశ్ పరారీలో ఉన్నట్లు పోలీసులు తెలిపారు. అదేవిధంగా శంషాబాద్ ఎయిర్పోర్టు పరిధిలోని ఫార్చ్యూన్ బ్లిస్ హోటల్లో బెట్టింగ్ నిర్వహిస్తుండగా ఎస్వోటీ పోలీసులు దాడులు చేశారు. ఏపీకి చెందిన సబ్ బుకీ కృపానందంను అదుపులోకి తీసుకున్నారు. రూ.3 లక్షల క్యాష్, 15 సెల్ఫోన్లు, ఒక లైన్ బోర్డు, ల్యాప్ టాప్ను స్వాధీనం చేసుకున్నారు. మెయిన్ బుకీ చైతన్య రెడ్డి పరారీలో ఉన్నట్లు పోలీసులు తెలిపారు.
