కామారెడ్డి జిల్లా కేంద్రంలో దైవ దర్శనం టికెట్ పేరిట ఆన్ లైన్ మోసం బయటపడింది. కల్కీనగర్ కాలనీకి చెందిన గట్టు విజయలక్ష్మి అనే టీచర్ కాశ్మీర్ లోని వైష్ణోదేవి ఆలయానికి వెళ్లడానికి హెలిక్యాప్టర్ టికెట్ కోసం ఆన్ లైన్ లో వెతికారు. ఈ క్రమంలో ఆన్ లైన్ లో టూర్స్ & ట్రావెల్స్ పేరిట టికెట్ బుక్ చేస్తామని సైబర్ కేటుగాళ్లు విజయలక్ష్మిని నమ్మించారు. టికెట్ బుక్ చేస్తామని ఓటీపీని పంపి, మాయా మాటలు చెప్పారు.
సైబర్ నేరగాళ్ల మాటలు నమ్మిన ఆ మహిళ మొబైల్ ఫోన్ కు వచ్చిన ఓటీపీని వారికి షేర్ చేశారు. ఓటీపీని రిసీవ్ చేసుకున్న కేటుగాళ్లు.. అదే అదనుగా భావించి ఆ మహిళ బ్యాంకు అకౌంట్ నుంచి రూ.20వేలు దోచేశారు. మనీ కట్ అయినట్టుగా ఆ టీచర్ ఫోన్ కు మెసేజ్ రావడంతో.. మోసపోయానని గ్రహించారు. వెంటనే స్థానిక దేవునిపల్లి పోలీస్ స్టేషన్ లో ఫిర్యాదు చేశారు. దీనిపై కేసు నమోదు చేసుకున్న దేవునిపల్లి పోలీసులు.. దర్యాప్తు చేపట్టారు.
