బషీర్బాగ్, వెలుగు: సామాజిక న్యాయ సాధనకు అసెంబ్లీ వేదిక కావాలని బీసీ రాజ్యాధికార సమితి అధ్యక్షుడు దాసు సురేశ్ కోరారు. తెలంగాణ అసెంబ్లీకి మూడో స్పీకర్ గా ఎన్నికైన గడ్డం ప్రసాద్ కుమార్ ను శుక్రవారం హైదర్ గూడలోని ఓల్డ్ ఎమ్మెల్యే క్వార్టర్స్లో దాసు సురేశ్ మర్యాదపూర్వకంగా కలిసి సత్కరించారు. విద్య, ఉద్యోగ, పారిశ్రామిక, రాజకీయ రంగాల్లో బడుగు వర్గాలు ఎదుర్కుంటున్న పలు సవాళ్లను ఈ సందర్భంగా ఆయన స్పీకర్ దృష్టికి తీసుకెళ్లారు.
అసెంబ్లీ వేదికగా అట్టడుగు వర్గాల ఆకాంక్షలు నెరవేర్చడానికి జరిగే చర్చలకు పూర్తిస్థాయిలో సహకరించాలని స్పీకర్ కు ఆయన విజ్ఞప్తి చేశారు. గడ్డం ప్రసాద్ కుమార్ స్పీకర్గా ఎన్నికవడం బలహీన వర్గాల నాయకత్వానికి స్ఫూర్తిదాయకమన్నారు. దాసు సురేశ్ వెంట బీసీ రాజ్యాధికార సమితి గ్రేటర్ హైదరాబాద్ మహిళా అధ్యక్షురాలు బండారు పద్మావతి, మహిళా యువజన కన్వీనర్ స్రవంతి తదితరులు పాల్గొన్నారు.
