పరీక్షా కేంద్రాలు దూరం.. పదో తరగతి స్టూడెంట్స్కు భారం!

5 నుంచి 12 కిలో మీటర్లు ఉన్న సెంటర్లకు వెళ్లాలంటే తప్పని తిప్పలు
చాలా ఊళ్లకు బస్సు సౌకర్యం కరువు.. ప్రవేట్వెహికల్సే దిక్కు
సమయం వృథా.. ఆర్థిక ఇబ్బందులని తల్లిదండ్రుల్లో ఆందోళన
ఏటా ప్రమాదాలు జరుగుతున్నా పట్టించుకునే నాథుడే లేడని ఆవేదన
ఏజెన్సీ ప్రాంతమైన భద్రాద్రికొత్తగూడెం జిల్లాలో ప్రత్యామ్నాయ ఏర్పాట్లు చేయాలని విజ్ఞప్తి

భద్రాద్రికొత్తగూడెం, వెలుగు : ఈ నెల 18 నుంచి పదో తరగతి పరీక్షలు రాయాలంటే ఏజెన్సీ ప్రాంతమైన భద్రాద్రికొత్తగూడెం జిల్లాలో విద్యార్థులు పడరాని పాట్లు పడాల్సిన పరిస్థితి నెలకొంది. ఎగ్జామ్ సెంటర్లు కిలోమీటర్ల కొద్దీ దూరం ఉండడంతో దూర భారంతో, ఆర్థిక ఇబ్బందులతో ఆందోళన చెందుతున్నారు. 5 నుంచి 12 కిలోమీటర్ల దూరంలో ఉన్న చాలా గ్రామాలకు సరైన బస్సు సౌకర్యం లేదు. ప్రైవేట్ వెహికల్స్ను ఆశ్రహించాల్సిందే. దీంతో రవాణా చార్జీలతోపాటు సమయం వృథా అవుతోందని విద్యార్థులు, వారి తల్లిదండ్రులు ఆందోళన వ్యక్తం చేస్తున్నారు. గతంలో ప్రైవేట్ వాహనాలు ప్రమాదాలకు గురైన ఘటనలూ ఉన్నాయి. ఈసారైనా దూరంగా ఉన్న సెంటర్ల విద్యార్థులకు ప్రయత్నామాయ ఏర్పాట్లు చేయాలని పలువురు కోరుతున్నారు.

ఎక్కడ..? ఏ పరిస్థితి?

మర్కోడ్ జడ్పీహెచ్ఎస్ స్టూడెంట్స్ దాదాపు 10 నుంచి 12 కిలోమీటర్ల దూరంలో ఉన్న ఆళ్లపల్లికి వెళ్లి ఎగ్జామ్ రాయాల్సి ఉంది.
అన్నపురెడ్డి పల్లి స్టూడెంట్స్ 10 కిలోమీటర్ల దూరంలోని చండ్రుగొండ మండలంలోని ఎర్రగుంట హైస్కూల్లోని ఎగ్జామ్ సెంటర్లో పరీక్ష రాయనున్నారు.
ఇల్లెందు మండలంలోని కొమరారం గవర్నమెంట్ హైస్కూల్ స్టూడెంట్స్ దాదాపు 8 కిలో మీటర్ల దూరంలో ఉన్న రొంపేడు ఆశ్రమ స్కూల్కు వెళ్లాలి.
మణుగూరు మండలంలోని సాంబాయిగూడెం, రామానుజవరం ప్రాంతాల్లోని స్టూడెంట్స్దాదాపు 8 నుంచి 10కిలోమీటర్ల దూరంలోని మణుగూరుకు వెళ్లాల్సిందే.
కుంటాల హైస్కూల్ స్టూడెంట్స్ 5 నుంచి 6 కిలోమీటర్ల దూరంలో ఉన్న బోడుకు వెళ్లి ఎగ్జామ్ రాయాలి.
పాల్వంచ మండలంలోని పాండురంగాపురం హైస్కూల్ స్టూడెంట్స్ 4 కిలో మీటర్ల దూరంలోని బూర్గంపహాడ్ మండలంలోని ఉప్పుసాక ఎగ్జామ్ సెంటర్కు, నాగారం, జగన్నాధపురం స్టూడెంట్స్ 4 కిలోమీటర్ల దూరంలోని పాల్వంచకు వెళ్లాల్సి ఉంది.
టేకులపల్లి మండలంలోని బేతంపూడి హైస్కూల్ స్టూడెంట్లలో కొందరిని 3 కిలోమీటర్ల దూరంలోని టేకులపల్లి, 5 కిలోమీటర్ల దూరంలోని సులానగర్లోని ఎగ్జామ్ సెంటర్లకు అలాట్ చేశారు.
పోకలగూడెం, మద్దుకూరు ప్రాంతాలకు చెందిన స్టూడెంట్స్ 5 కిలోమీటర్ల దూరంలోని చండ్రుగొండ ఎగ్జామ్ సెంటర్కు వెళ్లాల్సి ఉంది.
చెన్నంగుల గడ్డ ఆశ్రమ స్కూల్ స్టూడెంట్స్ 3 కిలోమీటర్ల దూరంలోని చల్ల సముద్రం స్కూల్లోని సెంటర్కు వెళ్లాలి.

రోజుకు రూ.250కి పైగా ఖర్చు..

ఏజెన్సీ ప్రాంతాల్లోని స్టూడెంట్స్ ఎగ్జామ్స్ కోసం ప్రైవేట్ వెహికల్స్లో వెళ్లి వచ్చేందుకు ఒక్కొక్కరు రూ. 250 నుంచి రూ. 350 వరకు ఖర్చు చేయాల్సి వస్తోంది. మరో వైపు ప్రైవేట్ వెహికల్స్లో రాకపోకలతో ప్రమాదాలు జరిగే అవకాశం ఉందని విద్యార్థి సంఘాల నేతలు, తల్లిదండ్రులు ఆందోళన వ్యక్తం చేస్తున్నారు. గతంలో కొమరారం నుంచి రొంపేడ్కు ఎగ్జామ్ రాసేందుకు వస్తున్న స్టూడెంట్స్ రోడ్డు ప్రమాదంలో గాయాలపాలైన దాఖలాలున్నాయి.

పరీక్షల నిర్వాహణకు అన్ని ఏర్పాట్లు చేశామని చెబుతున్న విద్యాశాఖ అధికారులు మాత్రం దూరభారం విషయంలో చేతులెత్తేశారు. ఇప్పటికైనా ఉన్నతాధికారులు స్పందించి ఏజెన్సీ ప్రాంతమైన ఈ జిల్లాలో దూరభారం ఉన్న గవర్నమెంట్ హై స్కూల్ స్టూడెంట్స్ను సెంటర్ల వద్దకు తీసుకెళ్లి.. తీసుకువచ్చే విధంగా ఉన్నతాధికారులే వెహికల్స్ఏర్పాటు చేయాలని విద్యార్థుల తల్లిదండ్రులు కోరుతున్నారు.

పాతకొత్తగూడెం సెంటర్ తో పరేషాన్..

జిల్లా కేంద్రమైన కొత్తగూడెం పట్టణంలోని పాతకొత్తగూడెంలో ఎగ్జామ్ సెంటర్తో విద్యార్థులు పరేషాన్ అవుతున్నారు. ఇక్కడి సెంటర్ హాల్ టికెట్లలో ఆనంద్ ఖని స్కూల్ పేరుతో ఉండడంతో స్టూడెంట్స్ అయోమయానికి గురవుతున్నారు. గతేడాది ఇదే పరిస్థితి నెలకొంది. అయితే దీనికి కారణం ఐదేండ్ల కింద చుంచుపల్లి మండల పరిధిలోని ఆనంద్ ఖని స్కూల్ను పాతకొత్తగూడెం స్కూల్లో కలిపేశారు. కానీ రికార్డుల్లో మాత్రం ఆనంద్ఖని స్కూల్ పేరే ఉంది. దీంతో ప్రతిఏటా సెంటర్ పాతకొత్తగూడెంలో ఉంటే పేరు మాత్రం అక్కడికి 5 కిలోమీటర్ల దూరంలో ఉండే ఆనంద్ ఖని అని ఉంటుంది.

ఈ పరిస్థితితో విద్యార్థులు తొలుత అటు వెళ్లి.. విషయం తెలుసుకొని పాతకొత్తగూడెం వస్తున్నారు. ఈ సమస్యను పరిష్కరించడంలో అధికారులు నిర్లక్ష్యం చేస్తున్నారని విద్యార్థుల తల్లిదండ్రులు ఆగ్రహం వ్యక్తం చేస్తున్నారు. ఈ పరిస్థితిపై టెన్త్ ఎగ్జామ్స్ఇన్చార్జి మాధవరావును వివరణ కోరగా పాతకొత్తగూడెంలో ఎగ్జామ్ రాసే స్టూడెంట్స్ అందరికీ ఆనంద్ ఖని స్కూల్, పాత కొత్తగూడెం స్కూల్ ఒక్కటే అనే విధంగా అవగాహన కల్పించాలని ఆయా స్కూళ్ల హెడ్మాస్టర్లకు సమాచారం ఇచ్చామని తెలిపారు.