- టచ్లో టీఆర్ఎస్ ఎమ్మెల్యేలు
- త్వరలో గులాబీ పార్టీ ఖాళీ
- మునుగోడులో గెలిచేది మేమే
- ఎమ్మెల్యే ఈటల రాజేందర్
యాదాద్రి/మునుగోడు, వెలుగు: కేసీఆర్ ఎంత ప్రయత్నించినా.. రాష్ట్రంలో ఓటమి ఖాయమని, ఇప్పటికే కాంగ్రెస్ ఖాళీ అయ్యిందని, త్వరలో టీఆర్ఎస్ కూడా ఖాళీ అవుతుందని బీజేపీ చేరికల కమిటీ కన్వీనర్, హుజురాబాద్ ఎమ్మెల్యే ఈటల రాజేందర్ అన్నారు. యాదాద్రి జిల్లా భువనగిరిలో గురువారం ఆయన విలేకరులతో మాట్లాడారు. ‘ఇప్పటికే కాంగ్రెస్ చతికిలపడింది. ఇక లేచే పరిస్థితి లేదు. చాలామంది టీఆర్ఎస్ ఎమ్మెల్యేలు టచ్లో ఉన్నారు. మునుగోడు ఉప ఎన్నిక లేకపోయి ఉంటే ఇప్పటికే టీఆర్ఎస్ఖాళీ అయ్యేది’ అని అన్నారు. రానున్న రోజుల్లో టీఆర్ఎస్లో ఊహించని పరిణామాలు జరుగుతాయని, 15 రోజుల్లోనే అల్లకల్లోలం మొదలైందని, రాబోయే రోజుల్లో మరింత పెరుగుతుందని చెప్పారు. ఎమ్మెల్యేలతో పాటు వేల సంఖ్యలో సర్పంచులు, ఎంపీటీసీలు, జడ్పీ చైర్మన్లు కూడా బీజేపీలో చేరేందుకు రెడీగా ఉన్నారని చెప్పారు.
ఎమ్మెల్యేలపై నిఘా పెట్టిండు
కేసీఆర్, ఎమ్మెల్యేల మధ్య ఆత్మీయ బంధం లేదని, అవసరాల బంధం మాత్రమే ఉందని ఈటల అన్నారు. తనకు మాత్రం టీఆర్ఎస్ ఎమ్మెల్యేలతో ఆత్మీయ సంబంధాలున్నాయన్నారు. కలిసి పనిచేసినం. కలిసి ఉద్యమం చేసినం. నన్ను బయటికి పంపించినప్పుడు అందరూ బాధపడ్డారని చెప్పారు. ఎమ్మెల్యేలతో పాటు ఏ ఒక్క ప్రజా ప్రతినిధిని కేసీఆర్ నమ్మరని, వారిపై నిఘా పెడ్తారని తెలిపారు. టీఆర్ఎస్ ప్రభుత్వాన్ని కూల్చాల్సిన పని లేదని, దానంతట అదే కూలిపోతుందన్నారు. 2014 వరకు తెలంగాణ గాంధీగా పిలవబడిన కేసీఆర్, ఎనిమిదేండ్ల పాలనలో తెలంగాణ ద్రోహిగా ఎందుకు పిలవబడుతున్నారో టీఆర్ఎస్ వాళ్లే తెలుసుకోవాలని అన్నారు.
కేసీఆర్ను గద్దె దించడమే లక్ష్యం
రాచరిక కుటుంబ పాలనను అంతమొందించి కేసీఆర్ను గద్దె దింపడమే బీజేపీ లక్ష్యమని ఈటల రాజేందర్ అన్నారు. నల్గొండ జిల్లా మునుగోడు మండలం పలివెల గ్రామంలో ఈటల సమక్షంలో పలువురు బీజేపీలో చేరారు. ఈ సందర్భంగా ఈటల విలేకరులతో మాట్లాడారు. బీజేపీలో చేరుతున్న ఎంపీటీసీ, ఎంపీపీ, సర్పంచులను టీఆర్ఎస్ ప్రభుత్వం బెదిరింపులకు గురి చేస్తోందని మండిపడ్డారు. ఉప ఎన్నికల్లో రాజగోపాల్ రెడ్డిని అత్యధిక మెజార్టీతో గెలిపించాలని, ఈ నెల 21న మునుగోడు మండల కేంద్రంలో జరిగే అమిత్ షా బహిరంగ సభకు ఉమ్మడి నల్గొండ జిల్లా ప్రజలు తరలి రావాలని కోరారు. కార్యక్రమంలో బీజేపీ నల్గొండ, యాదాద్రి జిల్లాల అధ్యక్షులు కంకణాల శ్రీధర్ రెడ్డి, పీవీ శ్యాంసుందర్రావు, పార్టీ రాష్ట్ర కార్యవర్గ సభ్యుడు షణ్ముఖ, ఆలేరు మాజీ ఎమ్మెల్యే బూడిద భిక్షమయ్య గౌడ్, గూడూరు నారాయణరెడ్డి తదితరులు పాల్గొన్నారు.
