గంగాధర, వెలుగు: రానున్న ఎంపీ ఎన్నికల్లో ప్రజలు తనను ఆశీర్వదించి గెలిపిస్తే ప్రజాసమస్యలపై ప్రశ్నించే గొంతునవుతానని మాజీ ఎంపీ బోయినపల్లి వినోద్కుమార్ అన్నారు. బుధవారం గంగాధర మండల బీఆర్ఎస్‌ కార్యకర్తలతో మధురానగర్లో సమావేశమయ్యారు. ఈ సందర్భంగా మాజీ ఎంపీ మాట్లాడుతూ సీఎం రేవంత్రెడ్డి మరో ఏక్నాథ్షిండేలా మారేలా ఉన్నారని అనుమానం వ్యక్తం చేశారు.
తెలంగాణను గుజరాత్ మోడల్ చేస్తానని మాట్లాడడం హాస్యాస్పదమని, దానిని రాహుల్గాంధీ ఒప్పుకుంటారా అని ప్రశ్నించారు. కాళేశ్వరం నీళ్లు ఇవ్వకుండా కాంగ్రెస్ ప్రభుత్వం రైతులకు అన్యాయం చేస్తోందని, యాసంగి పంటకు రూ.500 బోనస్ ఇవ్వాలని డిమాండ్ చేశారు. తాను కరీంనగర్ను స్మార్ట్ సిటీ జాబితాలో చేర్చి రూ.వెయ్యి కోట్లతో అభివృద్ధి చేశానని, రైల్వేలైన్ తీసుకొచ్చానన్నారు. బండి సంజయ్ ఎంపీ అయ్యాక ఒక్క నవోదయ స్కూల్, ఒక్క గుడికి ఫండ్స్ కూడా తేలేదని విమర్శించారు. కార్యక్రమంలో బీఆర్ఎస్‌ నేతలు సుంకె రవిశంకర్, నారదాసు లక్ష్మణ్రావు, జిల్లా అధ్యక్షుడు జీవీ.రామకృష్ణారావు, మండల అధ్యక్షుడు నవీన్రావు పాల్గొన్నారు.
