మొయినాబాద్ ఫాంహౌస్ ఘటన అనంతరం పత్తాలేకుండా పోయిన నలుగురు ఎమ్మెల్యేల జాడ ఇంకా తెలియడం లేదు. దాదాపు 17 రోజులుగా వారు అజ్ఞాతంలోనే ఉన్నారు. గత నెల 26 రాత్రి ప్రగతి భవన్కు వెళ్లిన ఆ నలుగురు ఆ తర్వాత ఎవరికీ కనిపించలేదు. అయితే అక్టోబర్ 30న సీఎం కేసీఆర్ వారిని తన వెంట మునుగోడు సభకు తీసుకెళ్లారు. అదే రోజు మళ్లీ తన వెంటే వారిని ప్రగతి భవన్కు తీసుకొచ్చారు.
ఇదిలా ఉంటే ఈ నెల 4న నలుగురు ఎమ్మెల్యేలను ప్రగతి భవన్ నుంచి మంత్రి ఎర్రవెల్లి ఫాం హౌస్ కు తరలించినట్లు సమాచారం. గత నెల 26 నుంచి పార్టీ నేతలెవరూ ఆ నలుగురిని కలవకుండా సీఎం కేసీఆర్ కట్టడి చేసినట్లు తెలుస్తోంది. ఆ ఎమ్మెల్యేలను ఎందుకు అజ్ఞాతంలో ఉంచారన్న దానిపై సొంత పార్టీ నేతల్లో చర్చ నడుస్తోంది. ప్రస్తుతం టీఆర్ఎస్లో ఎవరిని కదిపినా నలుగురు ఎమ్మెల్యేల గురించే చర్చ నడుస్తోంది.
