చైనాకు చెందిన 25 ఏళ్ల జాంగ్ జుక్వియాంగ్ (Zhang Xueqiang) అనే కుర్రాడు ప్రస్తుతం వార్తల్లో ప్రధాన అంశంగా మారిపోయాడు. నేటి తరం యువతకు ఒక గొప్ప నిదర్శనంగా నిలుస్తున్నాడు. కేవలం 5 ఏళ్ల కాలంలో ఫుడ్ డెలివరీ రైడర్గా పనిచేస్తూ లక్షా 60వేల డాలర్లు అంటే భారత కరెన్సీలో సుమారు రూ.కోటి 42 లక్షలు సేవింగ్స్ చేసి అందరినీ విస్మయానికి గురిచేశాడు. షాంఘై వంటి ఖరీదైన నగరంలో ఉంటూ కూడా.. కేవలం తన శ్రమను నమ్ముకుని ఈ అసాధారణ మైలురాయిని సృష్టించాడు.
అప్పుల ఊబి నుంచి కోటీశ్వరుడిగా:
జాంగ్ ప్రస్థానం అంత సులభంగా సాగలేదు. 2020లో తన స్వస్థలంలో ప్రారంభించిన బ్రేక్ఫాస్ట్ సెంటర్ నష్టపోవడంతో సుమారు 6 లక్షల రూపాయల అప్పులపాలయ్యాడు. ఆ అప్పులు తీర్చి, తన కాళ్ల మీద తాను నిలబడాలనే పట్టుదలతో షాంఘై నగరానికి ఉపాధి కోసం వలస వచ్చాడు. అక్కడ ఫుడ్ డెలివరీ ఏజెంట్గా చేరిన జాంగ్, కేవలం అప్పులు తీర్చడమే కాకుండా తన భవిష్యత్తు కోసం కోటి రూపాయలకు పైగా వెనకేయడం అతని నిబద్ధతకు, ఆర్థిక క్రమశిక్షణకు అద్దం పడుతోంది.
నిద్రలేని రాత్రులు.. విరామం లేని పరుగు:
జాంగ్ ఇంత పెద్ద మొత్తాన్ని సంపాదించడం వెనుక ఒకే ఒక్క సూత్రం ఉంది. అదే నిరంతర శ్రమ. అతను ప్రతిరోజూ సుమారు 13 నుండి 14 గంటల పాటు పని చేసేవాడు. ఉదయం 10:40 గంటలకు మొదలుపెట్టి.. అర్ధరాత్రి దాటిన తర్వాత 1 గంట వరకు ఆర్డర్లను డెలివరీ చేసేవాడు. ఏడాది పొడవునా సెలవులు తీసుకోకుండా పని చేయడమే కాకుండా, సమయాన్ని ఆదా చేసేందుకు డెలివరీ సమయంలో ఎప్పుడూ పరుగెడుతూనే ఉండేవాడు. అందుకే తన తోటి రైడర్లు అతన్ని గౌరవంగా 'ఆర్డర్ కింగ్' అని పిలుస్తుండేవాళ్లు.
సింపుల్ లైఫ్స్టైలే సక్సెస్ సీక్రెట్:
కేవలం సంపాదించడమే కాదు.. సంపాదించిన దానిని కాపాడుకోవడంలోనూ జాంగ్ నేటి తరానికి ఆదర్శంగా నిలిచాడు. అనవసరమైన లగ్జరీ ఖర్చులకు, వ్యసనాలకు దూరంగా ఉంటూ అత్యంత సాదాసీదా జీవితాన్ని గడిపాడు. ఐదేళ్లలో అతను తన ఎలక్ట్రిక్ బైక్ మీద సుమారు 3.24 లక్షల కిలోమీటర్లు ప్రయాణించి లక్షలాది ఆర్డర్లను సమయానికి డెలివరీ చేశాడు. కష్టపడే తత్వం ఉంటే ఏ పనిలోనైనా విజయం సాధించవచ్చని రియల్ లైఫ్ లో నిరూపించాడు జాంగ్.
ప్రస్తుతం తన దగ్గర ఉన్న సేవింగ్స్ మొత్తంతో షాంఘై నగరంలోనే రెండు కొత్త రెస్టారెంట్లను ప్రారంభించాలని జాంగ్ ప్లాన్ చేస్తున్నాడు. గతంలో ఓడిపోయిన చోటే మళ్లీ గెలవాలనే పట్టుదలతో ఉన్నాడు. ఒక సాధారణ డెలివరీ బాయ్గా మొదలై.. కోటీశ్వరుడిగా మారిన తర్వాత ఇప్పుడు ఒక వ్యాపారవేత్తగా ఎదగబోతున్న జాంగ్ ప్రయాణం నేటి తరానికి ఒక సక్సెస్ స్టోరీ లాంటిదని చెప్పుకోవచ్చు.
