ఆసియా టాప్ రిచ్ లిస్టులో మొదటి రెండు ప్లేస్లూ ఇప్పుడు మనవే. చైనీస్ బిలినియర్ ఝాంగ్ షాన్సన్ను వెనక్కి నెట్టి అదాని గ్రూప్ అధిపతి గౌతమ్ అదాని ఇప్పుడు రెండో ప్లేస్కు చేరుకున్నారు. రిలయన్స్ ఇండస్ట్రీస్ ఓనర్ ముకేశ్ అంబాని ఇప్పటికే మొదటి ప్లేస్లో కొనసాగుతున్న విషయం తెలిసిందే. అదాని గ్రూప్ షేర్లలో వచ్చిన తాజా ర్యాలీతో గౌతమ్ అదాని బ్లూమ్బర్గ్ బిలినియర్స్ ఇండెక్స్లో రెండో స్థానానికి చేరారు. ఈ ఏడాది ఫిబ్రవరి దాకా చైనాకి చెందిన ఝాంగ్ షాన్సన్ మొదటి ప్లేస్లో ఉన్నారు. ఆయన కంపెనీల ఐపీఓలు లిస్టింగ్ కావడంతో అమాంతం ఆసియా టాప్ రిచ్గా ఎదిగారు. ఆ తర్వాత మళ్లీ ఈ ప్లేస్లోకి మన ముకేశ్ అంబాని వచ్చేశారు. కాకపోతే ఈ ఏడాది ముకేశ్ సంపద 175.5 మిలియన్ డాలర్లు తగ్గిపోయింది. ఇదే టైములో అదాని సంపద 32.7 బిలియన్ డాలర్ల మేర పెరిగి 66.5 బిలియన్ డాలర్లకు చేరడం విశేషం. మరోవైపు షాన్సన్ సంపద 63.6 బిలియన్ డాలర్లకే పరిమితమైంది. ముకేశ్ అంబాని సంపద ఇప్పుడు 76.5 బిలియన్ డాలర్లు. ప్రపంచంలోని టాప్ రిచ్ లిస్టులో ఆయన 13వ ప్లేస్లో నిలుస్తున్నారు. ఆ తర్వాత 14 వ ప్లేస్లో గౌతమ్ అదాని ఉన్నారు. ఆసియా రిచ్ లిస్టులో ముకేశ్ గత రెండేళ్లుగా టాప్లో కొనసాగుతున్నారు.
అదాని సంపద ఎలా పెరిగింది....
అదాని గ్రీన్, అదాని ఎంటర్ప్రైజస్, అదాని గ్యాస్, అదాని ట్రాన్స్మిషన్ షేర్లు గత కొన్ని నెలలుగా భారీగా పెరిగాయి. అదాని టోటల్ గ్యాస్ షేర్లయితే గత ఏడాది కాలంలో 12 రెట్లు పెరగడం విశేషం. అదాని ఎంటర్ప్రైజస్ ఎనిమిది రెట్లు, అదాని ట్రాన్స్మిషన్ షేర్లు ఆరు రెట్లు పెరిగాయి. ఇదే టైములో అదాని గ్రీన్ ఎనర్జీ, అదాని పవర్ నాలుగు రెట్లు పెరగ్గా, అదాని పోర్ట్స్ రెట్టింపయింది. ఒకప్పుడు కమోడిటీ ట్రేడర్గా జీవితం మొదలెట్టిన గౌతమ్ అదాని ఇప్పుడు పోర్టులు, ఎయిర్పోర్టులు, ఎనర్జీ, లాజిస్టిక్స్, అగ్రిబిజినెస్, రియల్ ఎస్టేట్, ఫైనాన్షియల్ సర్వీసెస్, గ్యాస్ డిస్ట్రిబ్యూషన్, డిఫెన్స్ రంగాలలో కంపెనీలు నిర్వహిస్తున్నారు. ఎస్బీ గ్రీన్ ఎనర్జీ రెన్యువబుల్ ఎనర్జీ వ్యాపారాన్ని 3.5 బిలియన్ డాలర్లకు అదాని కొనేశారు. ఇండియాలో రెన్యువబుల్ ఎనర్జీ సెక్టార్లో జరిగిన అతి పెద్ద డీల్ ఇదే. జపాన్ కంపెనీ సాఫ్ట్బ్యాంక్ నుంచి అదాని గ్రూప్ దీనిని కొంది. ఇక గత రెండేళ్లలో చూస్తే అదానిలు ఇండియాలో చాలా కంపెనీలనే కొనేశారు. ప్రధానంగా ఇన్ఫ్రాస్ట్రక్చర్ సెక్టార్లోనే ఎక్కువ కొనుగోళ్లు జరిపారు. నవీ ముంబై ఎయిర్పోర్టులో జీవీకే వాటాను, గంగవరం పోర్టులో డీవీఎస్ రాజుకి ఉన్న 58.1 శాతం వాటాను కూడా అదాని గ్రూప్ ఈ ఏడాది మార్చిలోనే చేజిక్కించుకుంది. అంతకు ముందే గంగవరం పోర్టులో వార్బర్గ్ పింకస్కి ఉన్న 31.5 శాతం వాటా కొనేసింది. కిందటేడాది సెప్టెంబర్లో ముంబై ఇంటర్నేషనల్ ఎయిర్పోర్టులోని జీవీకే గ్రూప్ వాటాను అదాని గ్రూప్ కొనుక్కుంది. అహ్మదాబాద్, లక్నో, మంగళూరు, జైపూర్, తిరువనంతపురం, గౌహతి ఎయిర్పోర్టులను గవర్నమెంట్ బిడ్డింగ్లో అదాని గ్రూప్ చేజిక్కించుకుంది.
