- ఏటా 6,500 మందిని తీసుకుంటున్నట్లు కేంద్రానికి తప్పుడు లెక్కలు
- ఇస్తున్న జీతం రూ.11,700.. రూ.14వేలు ఇస్తున్నట్లు నివేదికలు
- రోడ్డునపడ్డ పార్ట్ టైం ఇన్ స్ట్రక్టర్ల కుటుంబాలు
హైదరాబాద్, వెలుగు: సమగ్ర శిక్ష అభియాన్(ఎస్ఎస్ఏ)లో మరో 2,500 మంది ఉద్యోగులను రాష్ట్ర సర్కార్ తొలగించింది. ఇప్పటికే కేజీబీవీల్లో పనిచేస్తున్న వెయ్యిమంది టీచర్లు, పీఈటీలను తీసేసిన ప్రభుత్వం.. తాజాగా పార్ట్టైం ఇన్స్ట్రక్టర్ల (పీటీఐ)ను ఉద్యోగాల నుంచి తొలగించింది. దీంతో ఆ కుటుంబాలు రోడ్డున పడే పరిస్థితి వచ్చింది. అంతేకాదు.. పీటీఐల విషయంలో ఎస్ఎస్ఏ అధికారులు.. కేంద్రానికి తప్పుడు నివేదికలను పంపిస్తున్నారు. రాష్ట్రంలో మొత్తం 6,500కుపైగా పీటీఐలను తీసుకుంటున్నామని, వారికి రూ.14 వేల జీతం ఇస్తున్నామని లెక్కలు చూపంచారు. వాస్తవానికి రాష్ట్రంలో 2,500 మంది పీటీఐలే పనిచేస్తున్నారు. వారికి ఇస్తున్న జీతం కూడా రూ.11,700 మాత్రమే. ఈ నేపథ్యంలోనే పీటీఐలు ఆగ్రహం వ్యక్తం చేస్తున్నారు. కేంద్రం విచారణ చేస్తే అన్ని లెక్కలూ బయటపడతాయంటున్నారు. కేంద్రం నిధులతోనే జీతాలిస్తున్న తమను ఉద్యోగాల నుంచి తొలగించడమేంటని ప్రశ్నిస్తున్నారు.
ఏపీలో తీసుకున్నా.. ఇక్కడ తీసుకోవట్లే
రాష్ట్రంలో ఎస్ఎస్ఏ పరిధిలో 2,500 మంది పనిచేసేవారు. ఆర్ట్ (డ్రాయింగ్, మ్యూజిక్, డ్యాన్స్)కేటగిరిలో 750 మంది, వర్క్ ఎడ్యుకేషన్ కింద1,300 మంది, పీఈటీలు (ఫిజికల్ అండ్ హెల్త్) 450 మంది వరకూ పనిచేసేటోళ్లు. వాళ్లందరికీ పీఆర్సీ రాకముందు నెలకు రూ.9 వేల జీతం ఉండగా, ఇటీవల రూ.11,700 అందుతోంది. అయితే వారి జీతాల్లో 60% కేంద్రం, మిగిలిన 40% రాష్ట్ర ప్రభుత్వం ఇస్తోంది.
2021–22 అకడమిక్ ఇయర్ సెప్టెంబర్లో ఫిజికల్ క్లాసులు ప్రారంభం కాగా, చాలా జిల్లాల్లో నవంబర్ నెలాఖరులో రిక్రూట్ చేసుకున్నారు. కొన్ని జిల్లాల్లో జనవరి, ఫిబ్రవరిలోనూ తీసుకోవడం గమనార్హం. అయితే ఈ విద్యా సంవత్సరానికిగానూ వారిని తీసుకున్నా.. ఆ తర్వాత కంటిన్యూ చేయలేదు. ఏప్రిల్ 23న వాళ్లందరినీ తొలగించేశారు. ఎస్ఎస్ఏ పరిధిలో పనిచేసే మిగతా వాళ్లను తీసుకున్నా.. పీటీఐలకు మాత్రం అవకాశం ఇవ్వలేదు. అయితే పక్క రాష్ట్రం ఏపీలో మాత్రం వాళ్లను మళ్లీ తీసుకున్నారని, నెలకు రూ.14,200 జీతం ఇస్తున్నారని పీటీఐలు చెప్తున్నారు.
అందరినీ రెగ్యులర్ చేయాలె
రెగ్యులర్ ఉద్యోగుల రిక్రూట్మెంట్ మాదిరిగానే 2012లో పీటీఐలను నియమించారు. పదేండ్లుగా పనిచేస్తున్నా చాలా తక్కువ జీతం ఇస్తున్నరు. అన్ని అర్హతలు, అనుభవం ఉన్నా మాకు న్యాయం జరగట్లేదు. 12 నెలల జీతం కూడా ఇవ్వట్లేదు. అర్ధంతరంగా ఉద్యోగాల్లోంచి తీసేస్తే ఎట్లా బతకాలె? మళ్లీ రెన్యువల్ చేయాలంటే పోరాటం చేయాల్సిందే. రాష్ట్రంలో తమ కాంట్రాక్టు రద్దు చేస్తే తామంతా వీధిన పడాల్సి వస్తది. కాబట్టి అందరినీ రెగ్యులర్ చేయాలె. ‑ కనుకుంట్ల కృష్ణహరి, పీటీఐల సంఘం నేత
ఇవి కూడా చదవండి
లక్షల్లో ఫాలోవర్లు..ఒక్క పైసా తీసుకోడు