ఎండాకాలం పండ్లు, కూరగాయలు త్వరగా పాడైపోతాయి. అందుకే వాటిని ఫ్రిజ్ల్లో దాచిపెడుతుంటారు. ఇప్పుడంటే ఫ్రిజ్ ఉంది కాబట్టి సరిపోయింది. మరి వెనకటి రోజుల్లో పండ్లని ఎలా స్టోర్ చేసుకునేవాళ్లు? అప్పుడు టెక్నాలజీ ఇంత డెవలప్ అవ్వలేదు కదా! అవును మరి డౌట్ రావడం సహజం. అయితే అఫ్ఘాన్ ప్రజల టెక్నిక్ చూస్తే... ముక్కున వేలేసుకోవడం ఖాయం.
అఫ్ఘానిస్తాన్లో ద్రాక్ష పండ్ల సాగు చాలా బాగుంటుంది. కానీ, వాటిని ఎక్కువ రోజులు నిల్వ చేయడమే కష్టం. ఎండాకాలంలో అయితే త్వరగా పాడైపోతాయి. అందుకని దానికో సొల్యూషన్ కనిపెట్టారు. ఆరు నెలల వరకు పాడవ్వకుండా ఉండేలా మాస్టర్ ప్లాన్ వేశారు. అదేంటో తెలుసా? మట్టి పాత్రలను వాడటం. పూర్వకాలం మట్టి పాత్రల్లోనే వంటావార్పు చేసేవారని తెలిసిందే. అలాగే మట్టిపాత్రలో ద్రాక్షపండ్లు పెట్టాక పై నుంచి మట్టి మూత పెట్టి అది ఓపెన్ కాకుండా అతికించేవాళ్లు. కాబట్టి దాంట్లో పెట్టిన ద్రాక్ష తినాలంటే ఆ మట్టి పాత్రని పగలకొట్టాల్సిందే. అలా వాళ్లు ద్రాక్షపండ్లని స్టోర్ చేసుకునేవాళ్లట. ఆ మట్టి పాత్రలను ‘కంగిన’ అంటారు. ఇప్పటికీ అక్కడ ఈ పద్ధతిని అనుసరించేవాళ్లు ఉండటం వల్లనే ఈ పద్ధతి గురించి తెలిసింది. ఇప్పటికే చాలామంది ఫ్రిజ్కు బదులు మట్టి కుండలు, కూజాలు, బాటిల్స్ వాడుతున్నారు. ఎంతైనా మట్టితో మనకున్న అనుబంధం ఈనాటిదా!
మట్టి పాత్రలో ద్రాక్ష నిల్వ ఉండడం బాగానే ఉంది. దాని వెనక సైంటిఫిక్ రీజన్ కూడా ఉంది అంటున్నారు కార్నెల్ యూనివర్సిటీ అసోసియేట్ ప్రొఫెసర్ జీన్ హంటర్. ‘‘దీన్ని పాసివ్ కంట్రోల్డ్ అట్మాస్పియర్ స్టోరేజ్ అంటారు. ద్రాక్షపండ్లే కాకుండా ఆక్సిజన్ని ఉపయోగించుకుని, కార్బన్ – డై – ఆక్సైడ్, నీటి ఆవిరిని విడుదల చేసే ఏ పండ్లైనా ఈ విధంగా నిల్వ చేసుకోవచ్చు. బంకమట్టి గాలిలో ఉన్న ఆక్సిజన్ని తీసుకుంటుంది. పాత్ర లోపల కార్బన్ – డై – ఆక్సైడ్ గాఢత ఎక్కువ ఉండడం వల్ల జీవక్రియలు జరగవు. దాంతో ఫంగస్ పెరిగే ఛాన్స్ లేదు. నీరు ఆవిరవడం కూడా చాలా స్లోగా జరుగుతుంది. దానివల్ల ద్రాక్ష ఎండిపోదు. ఒకవేళ దాని మీద నీళ్లు పడినా మట్టి పీల్చుకుంటుంది. కాబట్టి బ్యాక్టీరియా పెరిగే అవకాశం లేదు. ఈ టెక్నాలజీ వల్లే మట్టిపాత్రల్లో ద్రాక్షపండ్లు ఆరు నెలలు నిల్వ ఉంటున్నాయ’’ని చెప్పారాయన.
