భద్రాచలం, వెలుగు : ఏజెన్సీ ప్రాంతంలో అత్యధిక గిరిజన విద్యార్థులకు విద్యను అందిస్తున్న గిరిజన సంక్షేమ పాఠశాలలను గురుకులాలతో సమానంగా అభివృద్ధి చేయాలని, కన్వర్టెడ్ ఆశ్రమ పాఠశాలల్లో ఉపాధ్యాయ పోస్టులను మంజూరు చేయాలని ఎమ్మెల్సీ అలుగుబెల్లి నర్సిరెడ్డి ప్రభుత్వాన్ని కోరారు. భద్రాచలంలో ఆదివారం యూటీఎఫ్ ఉమ్మడి ఖమ్మం జిల్లా ఉపాధ్యాయుల సదస్సు జరగ్గా ఆయన ముఖ్య అతిధిగా పాల్గొని మాట్లాడారు.
గిరిజన సంక్షేమశాఖకు ప్రత్యేక పరిరక్షణ వ్యవస్థను ఏర్పాటు చేసి అర్హత కల్గిన ఉపాధ్యాయులకు పదోన్నతులు కల్పించాలని డిమాండ్ చేశారు. ఉపాధ్యాయుల బదిలీలు, ప్రమోషన్ల కోసం కృషి చేస్తానని హామీ ఇచ్చారు. టీఎస్యుటీఎఫ్ రాష్ట్ర అధ్యక్షులు జంగయ్య మాట్లాడుతూ...పీఆర్సీ కమిటీని నియమించాలని డిమాండ్ చేశారు. గిరిజన విద్యారంగం అభివృద్ధికి ప్రభుత్వం ప్రత్యేక శ్రద్ధ తీసుకోవాలని కోరారు.
