జగిత్యాల, వెలుగు : ‘‘అమ్మా.. అన్నం పెడుతుండ్లా.. ఎట్లున్నాయ్.. నర్సమ్మలు మంచిగా మాట్లాడుతుండ్లా..? సౌలతులెట్ల ఉన్నయి”అని హెల్త్ మినిస్టర్ హరీశ్ రావు పేషెంట్లను ఆరా తీశారు. జగిత్యాల జిల్లా కేంద్రంలోని ఎమ్మెల్సీ ఎల్.రమణ తండ్రి ఇటీవల మృతి చెందడంతో ఆయన కుటుంబాన్ని హరీశ్ రావు శనివారం పరామర్శించారు. తర్వాత ఎంసీహెచ్ లో సడెన్ విజిట్ చేశారు. ప్రతీ వార్డు తిరిగి మందులు సక్రమంగా అందుతున్నాయా, ట్రీట్మెంట్ బాగుంటున్నదా లేదా అనే వివరాలను పేషెంట్లను అడిగి తెలుసుకున్నారు. ప్రభుత్వమే అన్ని రకాల మందులతో పాటు టెస్టులను కూడా చేస్తుందని బయట ప్రైవేట్ లో చేయించుకోవద్దని సూచించారు. అనంతరం డాక్టర్ల అటెండెన్స్ రిజిస్టర్ తనిఖీ చేసి సూపరింటెండెంట్, డాక్టర్ల తో కలిసి రివ్యూ చేశారు. డ్యూటీ టైంలో లేని డాక్టర్లపై తగిన చర్యలు తీసుకోవాలని కలెక్టర్, సూపరింటెండెంట్ను ఆదేశించారు.
సూపరింటెండెంట్ రాములుపై సీరియస్
ఎంసీహెచ్ చుట్టూ చెత్త చెదారం ఉండడంతో హెల్డ్ డిపార్ట్మెంట్ సిబ్బంది పై మంత్రి హరీశ్ రావు సీరియస్అయ్యారు. డ్యూటీ టైంలో సూపరింటెండెంట్రాములు స్థానికంగా లేకపోవడంతో ఆగ్రహించిన ఆయన వెంటనే రావాలని ఆదేశాలు జారీ చేశారు. దీంతో గంటన్నరలో ఎంసీహెచ్కు చేరుకున్నారు. డ్యూటీ చేయాలని లేకపోతే మానుకోవాలని సూచించారు. గతంలో జరిగిన బాలింతల మరణాలు, కడుపు క్లాత్ మరిచిన ఘటనపై ప్రశ్నించేందుకు ప్రయత్నించగా, సమస్యలన్నీ తమ దృష్టి లో ఉన్నాయని మాట్లాడకుండానే వెళ్లిపోయారు.
సూపరింటెండెంట్ , డాక్టర్లకు నోటీసులు
జగిత్యాల జిల్లా హాస్పిటల్ సూపరింటెండెంట్ రాములుకు డీఎంఈ నోటీస్ జారీ చేశారు. శనివారం ఎంసీహెచ్ లో హెల్త్ మినిస్టర్ హరీశ్‌‌‌‌రావు తనిఖీ చేసిన సందర్భంగా సూపరింటెండెంట్ రాములు ఉదయం దాదాపు 9.40 నిమిషాలకు డ్యూటీకి వచ్చినట్లు రికార్డుల్లో నమోదైందని, మినిస్టర్ వచ్చినప్పుడు లేకపోవడంతో ఆయనకు సంజాయిషీ ఇవ్వాలని నోటీస్‌‌‌‌లో పేర్కొన్నారు. అలాగే ప్రొఫెసర్ఆఫ్ ఓబీజీ అరుణ శ్రీ లీవ్ పెట్టకుండా అందుబాటులో లేకపోవడం, ఆప్తాల్మజీ డాక్టర్ సుజాత, పీడీయాట్రిక్ ప్రొఫెసర్ స్నేహలత, డాక్టర్ ఆజాం అందుబాటులో లేకపోవడంపై డీఎంఈ నోటీసులు జారీ చేసి 18 లోపు సంజాయిషీ ఇవ్వాలని ఆదేశించారు.
