ఇంటి వద్దకే ఎఫ్ఐఆర్.. దుండిగల్‌‌లో మొదటి కేసు నమోదు‌‌

హైదరాబాద్‌‌ సిటీ/దుండిగల్, వెలుగు: బాధితుల ఇండ్లకే వచ్చి పోలీసులు ఫిర్యాదులు స్వీకరించే ‘విక్టిమ్‌‌/ సిటిజన్‌‌ సెంట్రిక్‌‌’ పోలీసింగ్‌‌ మొదలైంది. సైబరాబాద్‌‌ కమిషనరేట్‌‌ పరిధిలోని దుండిగల్ పోలీస్‌‌స్టేషన్​లో బుధవారం మొట్టమొదటి కేసు నమోదైంది. ఇంటి వద్దకే ఎఫ్‌‌ఐఆర్‌‌‌‌ ప్రొసీజర్‌‌ ప్రకారం.. బాధితులు డయల్ 1‌‌‌‌‌‌‌‌00కు లేదా పోలీస్‌‌ స్టేషన్​కు కాల్‌‌ వస్తే పెట్రోలింగ్‌‌ పోలీసులు, లేదా బ్లూకోల్ట్స్‌‌ సిబ్బంది ఘటనాస్థలానికి వెళ్లి ఫిర్యాదు స్వీకరించాలి. ఈ మేరకు గాగిల్లాపూర్ గ్రీన్ వుడ్స్ విల్లాలో జరిగిన చోరీకి సంబంధించి బాధితుడి ఇంటి వద్దనే పోలీసులు ఫిర్యాదు స్వీకరించారు. అనంతరం కేసు నమోదు చేసి ఎఫ్ఐఆర్ కాపీ అందజేశారు.

సత్వర న్యాయం కోసమే: సజ్జనార్ బషీర్‌‌బాగ్‌‌ : బాధితులకు సత్వర న్యాయం అందించడమే లక్ష్యంగా ఇంటి వద్దకే ఎఫ్ఐఆర్  అమలు చేస్తున్నట్లు హైదరాబాద్ సీపీ సజ్జనార్ తెలిపారు.  బుధవారం బంజారాహిల్స్‌‌లోని ఇంటిగ్రేటెడ్ కమాండ్ కంట్రోల్ సెంటర్​లో ఆయన మాట్లాడుతూ..  శారీరకంగా, మానసికంగా కుంగిపోయిన బాధితులు పోలీస్ స్టేషన్‌‌కు తిరగాల్సిన పరిస్థితి ఉండకూడదనే సదుద్దేశంతో ఈ విధానాన్ని ప్రవేశపెట్టినట్లు చెప్పారు. ఆత్మహత్యలు, అసహజ మరణాలు, రోడ్డు ప్రమాదాలు, చోరీలు, దోపిడీలు, వాహన దొంగతనాలు, మహిళలు, పిల్లలపై నేరాలు, ర్యాగింగ్ వంటి ఘటనల్లో ఈ విధానం ద్వారా బాధితులకు వేగంగా సేవలు అందించవచ్చన్నారు. ఈ విధానం ప్రకారం ఎఫ్‌‌ఐఆర్ నమోదు కాకపోతే హైదరాబాద్ సిటీ పోలీస్ వాట్సాప్ నంబర్ 94906 16555కు వివరాలు పంపాలని సీపీ సూచించారు.