ఇడ్లీ, దోసె, ఉప్మా, పూరి... ప్రతి ఇంట్లో కామన్గా కనిపించే బ్రేక్ఫాస్ట్ మెనూ ఇది. అయితే వీటిని ఎంత టేస్టీగా వండినా.. రోజూ తినాలంటే బోర్ కొడుతుంది ఎవరికైనా. అదే పిల్లలైతే అస్సలే తినరు. ఇన్స్టంట్ బ్రేక్ఫాస్ట్ ఆప్షన్స్ ఉన్నా అవి ఎంత వరకు హెల్దీ అన్నది చెప్పలేం. అందుకే అప్పుడప్పుడు బ్రేక్ఫాస్ట్లో రుచిని, ఆరోగ్యాన్ని బ్యాలెన్స్ చేసే కొత్త వంటలు ట్రై చేయాలి. అందుకు బెస్ట్ ఆప్షన్ ఈ పచ్చిబటానీ రెసిపీలు.
సాధారణంగా పచ్చి బటానీలని కూరల్లో గ్రేవీ కోసం వాడుతుంటారు. పులావ్, కిచిడి, బిర్యానీల్లోనూ వేస్తుంటారు. అలాకాకుండా అచ్చంగా పచ్చి బటానీలతో ఈ రెసిపీలు చేసుకొని తింటే బోలెడు లాభాలున్నాయి. వారానికోసారైనా అర కప్పు పచ్చి బటానీ తింటే 364 కేలరీలు, 19.3 గ్రాములు ప్రొటీన్, 17.6 గ్రాముల డైటరీ ఫైబర్, 10 గ్రాముల నేచురల్ షుగర్స్ శరీరానికి అందుతాయి. ఇవి బాడీలో కొలెస్ట్రాల్ లెవల్స్ని తగ్గించడానికి సాయం చేస్తాయి. రోజువారీ అవసరాలకి సరిపడా అమైనో యాసిడ్స్ని అందిస్తాయి. మెటబాలిజంని హెల్దీగా ఉంచడంతో పాటు బ్లడ్ షుగర్ లెవల్స్ని అదుపులో ఉంచుతాయి. మరిన్ని లాభాలున్న గ్రీన్పీస్ రెసిపీలు ఎలా తయారు చేసుకోవాలంటే..
గ్రీన్ పీస్ చిల్లా
కావాల్సినవి: పచ్చి బటానీ– అర కప్పు, పచ్చిమిర్చి పేస్ట్– ఒక టీ స్పూన్, శనగపిండి– ఒక టీ స్పూన్, పెరుగు– రెండు టీ స్పూన్లు, ఉల్లిగడ్డ పేస్ట్(కచ్చాపచ్చాగా)– ఒక టేబుల్ స్పూన్, బేకింగ్ పౌడర్– పావు టీ స్పూన్, టొమాటో, ఉల్లిగడ్డ తరుగు– ఒక్కోటి పావు టేబుల్ స్పూన్ చొప్పున, క్యాప్సికం – నాలుగు ముక్కలు, పల్లీలు ( వేగించి)– ఒక కప్పు, ఉప్పు– సరిపడా తయారీ: ప్రెజర్ కుక్కర్లో పచ్చి బటానీలు వేసి, రెండు కప్పుల నీళ్లు పోయాలి. అందులో కొద్దిగా ఉప్పు వేసి, రెండు నుంచి మూడు విజిల్స్ వచ్చే వరకు ఉడికించాలి. నీళ్లు వంపేసి బటానీలు గిన్నెలోకి తీయాలి. అందులో పచ్చిమిర్చి పేస్ట్, శనగపిండి, కచ్చాపచ్చాగా దంచిన ఉల్లిగడ్డ పేస్ట్ వేసి చేత్తో లేదా పప్పు గుత్తితో బాగా కలపాలి. పాన్లో నూనె వేడిచేసి, దానిపై ఆ మిశ్రమాన్ని నచ్చిన షేప్లో పరవాలి. పైనుంచి ఉల్లిగడ్డ, క్యాప్సికం, టొమాటో, వేగించి.. నలిపిన పల్లీలు వేసి ఒక నిమిషం మూత పెట్టాలి. చిల్లాను రెండో వైపు కూడా కాల్చి తింటే టేస్టీగా ఉంటుంది.
రెగ్యులర్గా తింటే..
- వీటిల్లోని ఫైబర్ వల్ల చాలాసేపటి వరకు కడుపు నిండుగా ఉండి త్వరగా ఆకలి వేయదు. బరువు కూడా కంట్రోల్లో ఉంటుంది.
- ఏదో ఒక రూపంలో రోజూ గుప్పెడు పచ్చిబటానీలు తింటే.. ఐరన్ లోపం దరిచేరదు. దానివల్ల గోళ్లు ఆరోగ్యంగా పెరుగుతాయి. జుట్టు , చర్మం మెరుస్తుంది.
- పచ్చి బటానీల్లోని ఫోలెట్, విటమిన్–బి9 డిప్రెషన్ నుంచి బయటపడేస్తాయి.
- వీటిల్లోని పొటాషియం, మెగ్నీషియం గుండె జబ్బుల నుంచి కాపాడతాయి.
గ్రీన్ పీస్ చట్పట్
కావాల్సినవి: పచ్చి బటానీలు(ఉడికించి)– రెండు కప్పులు, టొమాటో తరుగు– రెండు టీ స్పూన్లు, ఉల్లిగడ్డ తరుగు– రెండు టీ స్పూన్లు, పచ్చిమిర్చి తరుగు– రెండు టీ స్పూన్లు, నూనె– ఒక టేబుల్ స్పూన్, ఉప్పు, కారం– సరిపడా, కొత్తిమీర– కొద్దిగా, జీలకర్ర పొడి– ఒక టీ స్పూన్, నిమ్మరసం, టొమాటో సాస్– ఒక్కోటి ఒక్కో టేబుల్ స్పూన్ చొప్పున, సన్నకారప్పూస– కొద్దిగా
తయారీ: పాన్లో నూనె వేడిచేసి పచ్చిమిర్చి తరుగు, ఉడికించిన పచ్చి బటానీలు వేసి వేగించాలి. అందులో ఉల్లిగడ్డ తరుగు, ఉప్పు, కారం, జీలకర్ర పొడి, టొమాటో సాస్ వేసి మరికాసేపు వేగించాలి. తర్వాత స్టవ్ ఆపి టొమాటో తరుగు, నిమ్మరసం, కొత్తిమీర వేసి బాగా కలపాలి. ఆపై సన్నకారప్పూసతో గార్నిష్ చేసుకుంటే గ్రీన్పీస్ చట్పట్ రెడీ.
