- హైదరాబాద్లోని ఏఎస్ రావు నగర్లో ప్రమాదం
కుషాయిగూడ, వెలుగు: ‘‘పిల్లలతో కలిసి బయటికెళ్దాం! పది నిమిషాల్లో ఇంటికొస్తున్నా’’ అని తన భార్యకు చెప్పాడు భర్త. మరి కొద్దిసేపట్లో బయటికెళ్లి ఆనందంగా గడుపుతామని భావించిన ఆ కుటుంబాన్ని ఆర్టీసీ బస్సు ప్రమాదం విషాదంలో ముంచెత్తింది. భర్త వెళ్తున్న బైక్ను బస్సు ఢీకొట్టడంతో ఆయన చనిపోయాడు. కుషాయిగూడ పీఎస్ పరిధిలోని ఏఎస్రావు నగర్ మెయిన్ రోడ్డులో శుక్రవారం ఈ రోడ్డు ప్రమాదం జరిగింది. మృతుడిని కొడిమెళ్ల కిరణ్కుమార్(30)గా గుర్తించారు. సైనిక్పురిలో నివాసం ఉంటున్న కిరణ్ కుమార్కు భార్య అశ్విని, పిల్లలు విఘ్నేష్ (2), రిత్విక్ (ఐదు నెలలు) ఉన్నారు. కిరణ్ పోచారంలోని ఓ సాఫ్ట్వేర్ కంపెనీలో పనిచేస్తున్నాడు.
ఈసీఐఎల్కు వెళ్లి పది నిమిషాల్లో వస్తానని ఇంట్లో చెప్పి వెళ్లాడు. పని ముగించుకొని ఇంటికి వెళ్తుండగా, కిరణ్ బైక్ను ఆర్టీసీ బస్సు వెనుక నుంచి ఢీకొట్టింది. దీంతో కిరణ్ తలకు తీవ్రగాయాలువడంతో ఆసుపత్రికి తరలించారు. చికిత్స పొందుతూ అతను చనిపోయాడని పోలీసులు తెలిపారు. మృతుడి సోదరుడు ఫిర్యాదు మేరకు పోలీసులు కేసు నమోదు చేశారు.
