వాగ్వాదానికి దిగిన కాంగ్రెస్, బీజేపీ లీడర్లు
భిక్కనూరు, వెలుగు: భిక్కనూరులో కల్యాణలక్ష్మి చెక్కుల పంపిణీ గొడవకు దారితీసింది. లబ్ధిదారులకు తామే చెక్కులు అందజేస్తామంటూ కాంగ్రెస్, బీజేపీ లీడర్లు వాగ్వాదానికి దిగారు. మండలకేంద్రంలో సోమవారం ఎమ్మార్వో శివప్రసాద్ఆధ్వర్యంలో కల్యాణ లక్ష్మి చెక్కుల పంపిణీ కార్యక్రమాన్ని నిర్వహిస్తున్నారు. ప్రోగ్రామ్కు కాంగ్రెస్, బీజేపీ లీడర్లు వచ్చారు. లబ్ధిదారులకు చెక్కులు అందించే విషయమై రాష్ట్రంలో తమ పార్టీ అధికారంలో ఉందని, తామే చెక్కులు ఇస్తామంటూ కాంగ్రెస్ లీడర్లు పేర్కొన్నారు.
స్థానిక బీజేపీ ఎమ్మెల్యే కాటిపల్లి వెంకటరమణారెడ్డి కృషి వల్లే చెక్కులు మంజూరయ్యాయని తామే పంచుతామంటూ బీజేపీ లీడర్లు లేచారు. దీంతో ఇరువర్గాల వారు వాగ్వాదానికి దిగారు. ఎంపీపీ గాల్రెడ్డి, ఎమ్మార్వో శివప్రసాద్రెండు వర్గాల వారిని సముదాయించడంతో గొడవ సద్దుమణిగింది. అనంతరం చెక్కులు పంపిణీ చేశారు. అభివృద్ధి చేసే విషయమై పార్టీలు పోటీ పడితే బాగుంటుందని అక్కడికి వచ్చిన లబ్ధిదారులు లీడర్లకు చురకలు అంటించారు.
