హైదరాబాద్, వెలుగు: 1969 తెలంగాణ ఉద్యమంలో 365 మంది అమాయక విద్యార్థులను కాల్చి చంపిన చరిత్ర కాంగ్రెస్ పార్టీదని కేంద్ర మంత్రి, బీజేపీ రాష్ట్ర అధ్యక్షుడు కిషన్ రెడ్డి మండిపడ్డారు. మలిదశ ఉద్యమంలోనూ 1,200 మంది ఆత్మబలిదానం చేసుకున్నారని పేర్కొన్నారు.
శుక్రవారం సికింద్రాబాద్లో పార్టీ అభ్యర్థి మేకల సారంగపాణికి మద్దతుగా కిషన్ రెడ్డి ప్రచారంలో పాల్గొన్నారు. ఈ సందర్భంగా చిదంబరం వ్యాఖ్యలపై ఫైర్ అయ్యారు. పార్లమెంట్లో సుష్మాస్వరాజ్ నేతృత్వంలో బీజేపీకి చెందిన 160 మంది ఎంపీలు, బయట 4 కోట్ల మంది తెలంగాణ ప్రజలు ఆందోళన చేసి.. కాంగ్రెస్ మెడలు వంచి రాష్ట్రాన్ని తెచ్చుకున్నారన్నారు. అయితే, ఉద్యమం విషయంలో ఆ పార్టీ నియంతృత్వంగా వ్యవహరించిందన్నారు.
