హైదరాబాద్, వెలుగు: కాళోజీ నారాయణరావు యూనివర్సిటీ ఆఫ్ హెల్త్ సైన్సెస్ (కేఎన్ఆర్యూహెచ్ఎస్) ఎంబీబీఎస్(న్యూ రెగ్యులేషన్స్) ఫస్టియర్ రెగ్యులర్ పరీక్షల షెడ్యూల్ను సోమవారం విడుదల చేసింది. ఆగస్టు 12 నుంచి 24 వరకు ఉదయం 10 గంటల నుంచి మధ్యాహ్నం 1 గంట వరకు ఎగ్జామ్స్ నిర్వహించనున్నారు. ఆగస్టు 12న బయోకెమిస్ట్రీ పేపర్-1, 14న పేపర్-2, 17న అనాటమీ పేపర్-1, 19న పేపర్-2, 21న ఫిజియాలజీ పేపర్-1, 24న పేపర్-2 పరీక్షలు జరగనున్నాయి. ఎన్ఎంసీ రూల్స్ ప్రకారం.. మొదటి ఏడాది పాసయ్యేందుకు విద్యార్థులకు నాలుగు ప్రయత్నాల్లో మాత్రమే అవకాశం ఉంటుంది. డిజిటల్ వాల్యుయేషన్ విధానం అమలులో ఉన్నందున, విద్యార్థులకు కేవలం ఒకే ఆన్సర్ బుక్లెట్ ఇస్తారని అధికారులు తెలిపారు.
అటెండెన్స్ తప్పనిసరి..
పరీక్షలకు హాజరయ్యే విద్యార్థులకు థియరీలో 75 శాతం, ప్రాక్టికల్స్లో 80 శాతం హాజరు తప్పనిసరిగా ఉండాలని, ఇంటర్నల్ అసెస్మెంట్లో కనీసం 50 శాతం మార్కులు సాధించిన వారే అర్హులని వర్సిటీ పేర్కొంది. జులై 2 నుంచి 7వ తేదీ వరకు విద్యార్థులు ఎలాంటి ఫైన్లేకుండా ఆన్ లైన్ లో ఫీజు చెల్లించవచ్చు. రూ.200 ఫైన్ తో జులై 8, 9 తేదీల్లో, రోజుకు రూ.100 అదనపు పెనాల్టీతో 10, 11 తేదీల్లో చెలించేందుకు అవకాశం ఇచ్చారు.
