జీడిమెట్ల, వెలుగు: బీఆర్ఎస్ పార్టీకి మరోసారి అవకాశమిస్తే రాష్ట్రాన్ని అమ్మేస్తదని కుత్బుల్లాపూర్ సెగ్మెంట్ బీజేపీ అభ్యర్థి కూన శ్రీశైలం గౌడ్ విమర్శించారు. గురువారం బీజేపీ ఎంపీ, సినీనటుడు రవికిశోర్తో కలిసి కుత్బుల్లాపూర్లో ఆయన ఎన్నికల ప్రచారం నిర్వహించారు. ఈ సందర్భంగా కూన శ్రీశైలం గౌడ్ మాట్లాడుతూ.. రాష్ట్రాన్ని అప్పుల పాలు చేసిన ఘనత కేసీఆర్దేనన్నారు. కాంగ్రెస్ పార్టీకే గ్యారంటీ లేదని వారు చెప్పే పథకాలకు ఎక్కడిదని ఆయన ప్రశ్నించారు.
డబుల్ ఇంజన్ సర్కారుతోనేతెలంగాణలో అభివృద్ధి సాధ్యమన్నారు. ఈ నెల 30న జరిగే ఎన్నికల్లో కమలం గుర్తుకు ఓటేసి తనను గెలిపించాలని ఆయన కోరారు. అనంతరం సూరారం రాంలీలా మైదానంలో జరిగిన బీసీ ఆత్మగౌరవ సభలో ఎంపీ లక్ష్మణ్ మాట్లాడుతూ.. నయా నిజాం కేసీఆర్ నిరంకుశ పాలనకు ముగింపు పలకాలని పిలుపునిచ్చారు. కుత్బుల్లాపూర్ అభ్యర్థి కూన శ్రీశైలం గౌడ్ను భారీ మెజార్టీతో గెలిపించాలని కోరారు. కార్యక్రమంలో ఓబీసీ మోర్చా రాష్ట్ర అధ్యక్షుడు ఆలె భాస్కర్, రాష్ట్ర మాజీ ఉపాధ్యక్షుడు మల్లారెడ్డి, ఓబీసీ నాయకుడు నందనం దివాకర్తదితరులు పాల్గొన్నారు.
