కాళేశ్వరం ప్రాజెక్టు అక్షయపాత్ర : కేటీఆర్​

• మేడిగడ్డ’లో 2 పిల్లర్లు కుంగితేప్రాజెక్టు కూలిందంటున్నరు: కేటీఆర్​
• అప్పులు చేసి ఆదాయాన్ని పెంచి పేదలకు పంచినం
• డల్లాస్​లో బీఆర్ఎస్ సిల్వర్​జూబ్లీ,రాష్ట్ర ఆవిర్భావ వేడుకలు

హైదరాబాద్, వెలుగు: అసెంబ్లీ ఎన్నికల్లో ఓడిపోయినా తెలంగాణను ప్రేమించడంలో బీఆర్ఎస్ నేతలుగా తాము ఎప్పుడూ ముందే ఉన్నామని ఆ పార్టీ వర్కింగ్ ప్రెసిడెంట్ కేటీఆర్ అన్నారు. మహాత్ముని స్ఫూర్తితో కేసీఆర్ అందరినీ ఏకం చేసి తెలంగాణను సాధించారని చెప్పారు. మూడేండ్లలో కేసీఆర్ తిరిగి సీఎం అవుతారని ధీమా వ్యక్తం చేశారు. సోమవారం డల్లాస్​లో నిర్వహించిన పార్టీ సిల్వర్ జూబ్లీ, తెలంగాణ ఆవిర్భావ వేడుకల్లో ఆయన పాల్గొని మాట్లాడారు. 

‘‘కాళేశ్వరం ప్రాజెక్టు 45 లక్షల ఎకరాలకు నీళ్లిచ్చే అక్షయపాత్ర. ఆ ప్రాజెక్టుతో బీడు భూములకూ నీళ్లను మళ్లించాం. నాలుగేండ్లలోనే కాళేశ్వరం నిర్మించిన ఘనత కేసీఆర్​ది. కాళేశ్వరం అంటే మూడు బ్యారేజీలు, 19 రిజర్వాయర్లు. అయితే మేడిగడ్డ బ్యారేజీలోని ఉన్న 371 పిల్లర్లలో 2 పిల్లర్లు కుంగితే కాళేశ్వరం ప్రాజెక్టు కూలిందని విషప్రచారం చేస్తున్నరు. మేడిగడ్డ పిల్లర్లకు రిపేర్లు చేసి వాడుకలోకి తేవాలి” అని కేటీఆర్ అన్నారు.

రాష్ట్ర ఆదాయం పెంచి పేదలకు పంచినం

కేసీఆర్ పాలనలో తెలంగాణ ఆర్థికంగా ఎంతో అభివృద్ధి చెందిందని కేటీఆర్​అన్నారు. అప్పులు చేసి రాష్ట్ర ఆదాయాన్ని పెంచి పేదలకు పంచామన్నారు. ఆర్థిక క్రమశిక్షణ వల్లే అప్పుల్లో కింది నుంచి ఆరో స్థానంలో ఉన్నామని తెలిపారు. అద్భుతమైన ఇరిగేషన్ ప్రాజెక్టులు నిర్మించిన ధాన్యం ఉత్పత్తి రాష్ట్రాన్ని నంబర్ వన్​గా నిలిపామన్నారు. రాష్ట్రంలో సంపద పెరిగింది.. భూములపై ఎన్నారైలు పెట్టుబడులు పెట్టారని చెప్పారు.  తెలుగు వాళ్లకు టెక్సస్​ రూపంలో మూడో రాష్ట్రం ఉందని ఆయన అన్నారు. తనకు ఏమాత్రం అమెరికాలో ఉన్నట్టు అనిపించడం లేదని చెప్పారు. అమెరికాలో మన విద్యార్థులు ఇబ్బందులు పడుతున్నట్టు తెలిసిందని, బీఆర్ఎస్ తరఫున లీగల్ సెల్ ఏర్పాటు చేసి వారికి అండగా నిలుస్తామన్నారు.