- రేవంత్ను కేంద్రం ఎందుకు కాపాడుతున్నది?: కేటీఆర్
హైదరాబాద్, వెలుగు: బీజేపీ నేతృత్వంలోని కేంద్ర ప్రభుత్వం సీఎం రేవంత్కు రక్షణ కవచంలా నిలబడుతున్నదని బీఆర్ఎస్వర్కింగ్ ప్రెసిడెంట్ కేటీఆర్ఆరోపించారు. ఢిల్లీలో రాజకీయంగా కొట్లాడుతున్నా.. రాష్ట్రంలో మాత్రం కాంగ్రెస్ సీఎంకు అన్ని రకాలుగా కాపు కాస్తున్నదని ఆదివారం ఓ ప్రకటనలో విమర్శించారు.
ఒకప్పుడు కాళేశ్వరం ప్రాజెక్టు ప్రమాదంపై ఆగమేఘాల మీద స్పందించి కేంద్ర ప్రభుత్వ సంస్థలను రంగంలోకి దించి విచారణలంటూ వేధింపులకు పాల్పడిన కేంద్ర ప్రభుత్వం.. కాంగ్రెస్ హయాంలో సుంకిశాల ఇన్టేక్ వెల్ప్రమాదం, ఎస్ఎల్బీసీ సొరంగంలో పెను ప్రమాదాలపై మాత్రం కనీసం స్పందించడం లేదని ఆరోపించారు. కాళేశ్వరం ప్రాజెక్టుపై కేంద్రం ఎన్ డీఎస్ఏని రంగంలో దించినట్టుగానే.. సుంకిశాల, ఎస్ఎల్బీసీ ప్రమాదాలపైనా ఎన్డీఎస్ఏతో విచారణ జరిపించాలని డిమాండ్ చేశారు.
బీజేపీపై పోరాటం చేస్తున్నామంటూ రాహుల్ గాంధీ చెప్తున్నా.. తెలంగాణలో మాత్రం కాంగ్రెస్, బీజేపీ కలిసి పనిచేస్తున్న విషయం అనేకసార్లు స్పష్టమైందన్నారు. అసలు రేవంత్ను కేంద్రం ఎందుకు కాపాడుతున్నదన్న అంశం మిలియన్ డాలర్ల ప్రశ్నగా మారిందని కేటీఆర్ అన్నారు. బీజేపీలో చేరుతానని సీఎం రేవంత్లోపాయికారి ఒప్పందం చేసుకోవడంతోనే కేంద్రం కాపాడుతున్నదని ఆరోపించారు.
