నవీపేట్, వెలుగు: బ్యాంకులో డ్రా చేసిన రూ.2లక్షలను ఓ మాయ లేడీ క్షణాల్లో కొట్టేసిన ఘటన నిజామాబాద్జిల్లా నవీపేట్ లో జరిగింది. బాధితుడి వివరాల ప్రకారం.. నవీపేట్ మండల కేంద్రంలోని తడగామకు చెందిన ఐలపురం నడిపి పోశెట్టికి స్థానిక ఎస్బీఐ బ్యాంకులో అకౌంట్ఉంది.
ఇటీవల పంట అమ్మగా వచ్చిన పైసలు అందులో పడ్డాయి. శుక్రవారం మధ్యాహ్నం బ్యాంకుకు వెళ్లిన నడిపి పోశెట్టి రూ.2 లక్షలు డ్రా చేశాడు. బ్యాంక్అధికారి నుంచి పాస్బుక్ తీసుకుంటుండగా, వెనుకనే నిలబడి ఉన్న ఓ మహిళ రూ.2లక్షలు కొట్టేసి పరారైంది.
కొద్దిసేపటి తర్వాత గుర్తించిన పోశెట్టి వెంటనే బ్యాంక్ మేనేజర్ కు ఫిర్యాదు చేశాడు. సీసీ ఫుటేజీలను పరిశీలించి, స్థానికుల ద్వారా మహిళ సమాచారం అందుకున్నారు. నేరుగా ఆమెకు ఫోన్చేయడంతో కొట్టేసిన పైసలను తెచ్చి ఇచ్చింది.
