వాట్సాప్‌‌ గ్రూపుల్లో లోకల్‌‌ వార్..పేలుతున్న పంచ్ డైలాగ్స్, మీమ్స్.. పేరడీ సాంగ్స్‌‌

• విలేజ్‌‌ గ్రూపుల్లో వాదోపవాదాలు.. స్టేటస్‌‌లు, వీడియోలే అస్త్రాలు
• పేలుతున్న పంచ్​ డైలాగ్స్.. మీమ్స్.. పేరడీ సాంగ్స్‌‌
• జోరుగా రీల్ ​పాలిటిక్స్​..
• కంట్రోల్ చేయలేక తలలు 
• పట్టుకుంటున్న అడ్మిన్లు 

హైదరాబాద్, ఆదిలాబాద్​, వెలుగు: పల్లె పోరు రసవత్తరంగా మారుతున్నది. మొదటి విడత పంచాయతీ ఎన్నికలకు ఇప్పటికే నామినేషన్లు పూర్తికాగా..అభ్యర్థులు ప్రచారం మొదలుపెట్టారు. సోషల్​మీడియా వేదికగా ప్రజలను ఆకట్టుకునేలా క్యాంపెయిన్​ నిర్వహిస్తున్నారు. పంచ్​డైలాగ్స్.. మీమ్స్.. పేరడీ సాంగ్స్‌‌తో వాట్సాప్​ గ్రూపులను హోరెత్తిస్తున్నారు. స్టేటస్‌‌లు, వీడియోలే అస్త్రాలుగా గంటకో రీల్​ షేర్​ చేస్తూ..సోషల్​ వార్ ​చేస్తున్నారు.  ఒకప్పుడు ఎన్నికలొచ్చాయంటే  గ్రామాల్లో ఒక రకమైన కోలాహలం కనిపించేది. వాల్ ​రైటింగ్స్​, పాంప్లెంట్స్​ పంపిణీ,  మైకుల రొదలు, డప్పుల మోతలతో ర్యాలీలు కనిపించేవి. ఇక ఉదయం, సాయంత్రం  రచ్చబండలు, కూడళ్ల వద్ద ముచ్చట్లు నడిచేవి. కానీ ఇప్పుడు సీన్​ మారింది. ప్రస్తుతం ఊరూరా ‘డిజిటల్’ దండోరా మోగుతున్నది. పల్లె ఓటరు చేతిలోని స్మార్ట్ ఫోనే  రాజకీయ రణక్షేత్రంగా మారింది. ఉదయం లేచింది మొదలు.. రాత్రి పడుకునే వరకు సోషల్​మీడియాలో మరీ ముఖ్యంగా వాట్సాప్‌‌ గ్రూపుల్లో చర్చలు,  వాదోపవాదాలు నడుస్తున్నాయి.   అభ్యర్థుల వీడియోలు ప్రతి ఓటరు ఫోన్​లో ‘రీల్స్​’ రూపంలో చక్కర్లు కొడ్తున్నాయి. అదే సమయంలో ‘ఊరిని లూటీ చేసేటోడు కాదు.. ఊరి కోసం డ్యూటీ చేసేటోడు సర్పంచ్ కావాలి..’ అంటూ యూత్​స్టేటస్‌‌లలో పంచ్​డైలాగులు పేలుతున్నాయి!

పొలిటికల్ అడ్డాగా వాట్సాప్!

పల్లెల్లో ప్రస్తుతం ఎవరి చేతిలో చూసినా స్మార్ట్​ ఫోన్లే కనిపిస్తున్నాయి.  ఊరికో వాట్సాప్ గ్రూప్, పార్టీకో గ్రూప్, ఆ పార్టీలోనూ వర్గాలవారీగా, కులాలవారీగా  గ్రూపులు పెడుతున్నారు. వీటితోపాటు ఫ్యామిలీ, ఫ్రెండ్స్​ గ్రూపులను పంచాయతీ ఎన్నికల చర్చా వేదికలుగా మార్చేస్తున్నారు. గతంలో రచ్చబండల వద్ద వాదోపవాదాలు జరిగేవి.  ఊరి బాగోగుల  గురించి, అభ్యర్థుల మంచిచెడ్డల గురించి బహిరంగంగా చర్చించి, పెద్దలు ఓ నిర్ణయానికి వచ్చేవారు.  మిగిలినవారంతా అనుసరించేవారు. కానీ, ఇప్పుడు పరిస్థితి పూర్తిగా మారింది. 50 ఏండ్లలోపు వారంతా ప్రస్తుతం సోషల్ మీడియా ప్లాట్‌‌ఫామ్‌‌ల మీదే  మాట్లాడుకుంటున్నారు. తమకు నచ్చిన పార్టీ.. లేదంటే అభ్యర్థి గొప్పలను చెప్పడం దగ్గరినుంచి ఎదుటి పార్టీ, ప్రత్యర్థుల తప్పులను ఎత్తిచూపడం దాకా పోస్టుల మీద పోస్టులతో వాట్సాప్​ గ్రూపులను ముంచెత్తుతున్నారు.  గ్రూపుల్లో మొదలయ్యే కొన్నిచర్చలు.. చినికి చినికి గాలివానలా మారి ‘నువ్వెంతంటే నువ్వెంత’ అనే స్థాయి దాకా వెళ్తున్నాయి. దీంతో లోకల్ లీడర్లు వాట్సాప్ గ్రూపుల ద్వారానే ఓటర్ల నాడిని పసిగట్టి, అందుకు తగ్గట్టు ప్రచారానికి, పోల్​మేనేజ్‌‌మెంట్‌‌కు ప్లాన్ చేస్తున్నారు. ఇక వాట్సాప్ గ్రూపుల్లో పొలిటికల్ వార్ రచ్చను కంట్రోల్ చేయలేక అడ్మిన్లు తలలు పట్టుకుంటున్నారు. 

ఈసారి పోటీకి సై అంటున్న యూత్​.. 

‘‘బతకడానికి రాజకీయాల్లోకి రావద్దు.. బతుకులను మార్చడానికి రండి..!  నీకే చెబుతున్నా మిత్రమా.. ఊరి తలరాతను మార్చే సమయం వచ్చింది.. మేలుకో.. ! గ్రామాలు బాగుపడాలి అంటే యువత రాజకీయాల్లోకి రావాలి..! ఒక పూటలో తినే కూరగాయలు ఏరి..ఏరి కొంటాం. ఐదేండ్లు పాలించే నాయకుడిని ఎన్నుకునేందుకు ఇంకెంత ఆలోచించాలి..! మనం వేసే ఓటు ఐదేండ్లు అన్నం పెట్టేలా ఉండాలి.. కానీ ఒక్కరోజు బిర్యానీ పెట్టేలా కాదు..! ’’ ..అంటూ సర్పంచ్ ఎన్నికల్లో భాగంగా సోషల్ మీడియాలో జోరుగా డైలాగులు పేలుతున్నాయి. వాట్సాప్ స్టేటస్‌‌లతో పాటు ఇన్ స్టాగ్రాం, ఫేస్‌‌బుక్ లోనూ వీటిని వైరల్ చేస్తున్నారు. సర్పంచ్‌‌గా పోటీ చేయాలనుకునే వారిని చైతన్యపరిచేలా పాటలతో రీల్స్ చేస్తున్నారు. 

ముఖ్యంగా యువత సర్పంచ్ ఎన్నికల్లో పోటీ చేయాలంటూ మద్దతు తెలుపుతున్నారు.  తమ ఊరికోసం ఏదో చేయాలనే తపనతో యువత, ఉన్నత విద్యావంతులు ఈ సర్పంచ్ ఎన్నికల ద్వారా రాజకీయ అరంగేట్రం చేసేందుకు ఆసక్తిచూపుతున్నారు. ఉదాహరణకు వెనుకబడిన ఆదిలాబాద్​జిల్లాలో అగ్రికల్చర్ బీఎస్సీ పూర్తి చేసి, సివిల్స్ కోసం సిద్ధమవుతున్న బానోత్ కావేరి అనే యువతి నార్నూర్ గ్రామ సర్పంచ్ స్థానం కోసం నామినేషన్​ వేశారు. బీఈడీ చేసి టీచర్​ఉద్యోగానికి ప్రిపేర్​అవుతున్న  కడదరపు పద్మ అనే యువతి.. జందాపూర్ గ్రామం నుంచి పోటీకి సిద్ధమయ్యారు.  ఇచ్చోడ సర్పంచ్ స్థానం కోసం ఎంబీఏ చేసిన రాథోడ్ మౌనిక నామినేషన్ వేశారు. ఉట్నూర్ మండలంలోని పులిమడుగు గ్రామంలో ఏఎన్ఎం కోర్సు చేసిన సుజాత నామినేషన్ దాఖలు చేశారు. ఇలా వీరి బాటలోనే చాలా గ్రామాల్లో గ్రాడ్యుయేట్లు, పోస్టు గ్రాడ్యుయేట్లు బరిలో నిలుస్తున్నారు.

చక్కర్లు కొడుతున్న షార్ట్​వీడియోలు.. రీల్స్​..

ప్రస్తుతం గంటల కొద్దీ ప్రసంగించే శక్తి అభ్యర్థులకు, వినే ఓపిక జనానికి లేదు. దీంతో అభ్యర్థులు తాము చెప్పాలనుకున్న విషయాన్ని నిమిషం నిడివిగల షార్ట్ వీడియోలు, రీల్స్‌‌లో చెప్పేస్తున్నారు. ప్రత్యేకంగా ఇన్‌‌ఫ్లుయెన్సర్లతో రీల్స్ చేయించుకుని, ఓటర్లకు వాట్సాప్ ద్వారా షేర్ చేస్తున్నారు. వీటితోపాటు సినిమా పాటలకు పేరడీలు, ఫొటోల మార్ఫింగ్, ఎడిటెడ్ వీడియోలూ వైరల్ అవుతున్నాయి. ఇక ఈసారి కొత్తగా గ్రామీణ యువత కేవలం రాజకీయ ఆరోపణలకే పరిమితం కాకుండా, సందేశాత్మక వీడియోలను తీసి వైరల్​చేస్తున్నది. ‘మద్యం, డబ్బుకు అమ్ముడుపోతే మన భవిష్యత్​మనమే నాశనం చేసుకున్నట్లు’ అంటూ సాగే ఎమోషనల్ వీడియోలు వాట్సాప్ స్టేటస్‌‌లుగా పెట్టుకుంటున్నారు. 

డబ్బు తీసుకొని ఓటేస్తే గెలిచిన అభ్యర్థిని సమస్యలపై నిలదీయలేమంటూ వీడియోలు చేస్తున్నారు. ‘నీ ఓటు.. నీ భవిష్యత్తు’, ‘ఒక్క రోజు దావత్ కోసం ఐదేండ్లు బానిస బతుకు వద్దు’ అంటూ  కొటేషన్స్​పోస్ట్ చేస్తున్నారు. ప్రలోభాలకు లొంగవద్దని, మంచి నాయకుడిని ఎన్నుకోవాలని పిలుపునిస్తున్నారు. మరోవైపు డబ్బులు ఖర్చు చేయవద్దని, నిజాయతీగా  ప్రచారం చేసి గెలవాలని అభ్యర్థులకు సలహాలు ఇస్తున్నారు. ఎన్నిక ముందు ప్రజలకు దండాలు పెట్టిన అభ్యర్థులు.. గెలిచిన తర్వాత మారిన  తీరు, ఊరిని, ప్రజలను నిర్లక్ష్యం చేస్తున్న వైనాన్ని షార్ట్‌‌ వీడియోలు, షార్ట్​ ఫిల్మ్ లుగా తీసి, వాటిని వైరల్​చేస్తున్నారు. అదే సమయంలో గతంలో సర్పంచ్‌‌గా గెలువడం కోసం ఆస్తులు అమ్ముకొని వీధిన పడినవారి కేస్​స్టడీస్​ తీసుకొని రూపొందించిన షార్ట్​ ఫిల్మ్‌‌లు కూడా సోషల్​ మీడియాలో తెగ వైరల్​అవుతున్నాయి. అభ్యర్థులతో కలిసి ప్రచారం చేసిన తర్వాత ఏర్పాటు చేస్తున్న పార్టీలు, ఆ క్రమంలో జరిగే గొడవలు, కేసులు, దాని వల్ల భవిష్యత్తులో ఎదురయ్యే సమస్యలను తెలిపే వీడియోలను సైతం షేర్ చేస్తున్నారు.