మధ్యప్రదేశ్ లో దారుణం జరిగింది. తన కుమారుడిని రక్షించుకోవడానికి ప్రయత్నిస్తున్న ఓ తల్లిని పోలీసులు కారు బానెట్ పై 500 మీటర్ల దూరం తరలించడం సంచలనం సృష్టించింది. దీనిని ఓ వ్యక్తి వీడియో తీసి సోషల్ మీడియాలో షేర్ చేశారు. కొన్ని గంటల్లో ఇది వైరల్గా మారింది. ఉన్నతాధికారులు తెలిపిన వివరాల ప్రకారం.. నార్సింగ్పూర్జిల్లాలోని గోటేగావ్లో డ్రగ్స్ స్మగ్లింగ్ ఎక్కువగా జరుగుతూ ఉంటుంది. సమాచారం మేరకు డ్రగ్స్ సరఫరా చేస్తూ అనుమానాస్పదంగా కనిపించిన సోనుకహర్ నివాసంపై పోలీసులు దాడి చేశారు. అతని ఇంట్లో రూ.3 లక్షల విలువైన డ్రగ్స్ స్వాధీనం చేసుకున్నారు. అనంతరం పోలీసులు అతన్ని కస్టడీలోకి తీసుకున్నారు. విషయం తెలుసుకున్న నిందితుడి తల్లి మోహిని కహర్ సంఘటనా స్థలానికి చేరుకుని తన కుమారుడిని అరెస్ట్ చేయడం పట్ల నిరసన వ్యక్తం చేసింది.
అతడ్ని విడుదల చేయాలని డిమాండ్ చేస్తూ.. పోలీసులు ఉన్న కారు బానెట్పై నిల్చుంది. అధికారులు పై నుంచి దిగాలని కోరినా.. కుమారుడిని వదిలే వరకు తాను దిగబోనని అధికారులతో చెప్పింది. చివరికి పోలీసులు బానెట్పై ఉండగానే.. ఆమెను 500 మీటర్ల దూరంలో ఉన్న పోలీస్ స్టేషన్వరకు తరలించారు. ఈ దృశ్యాలను ఒకరు వీడియో తీసి సోషల్ మీడియాలో అప్లోడ్ చేశారు. వీడియో కాస్త వైరల్ కావడంతో ఎస్పీ అనిల్ అజ్మీరియా కేసు దర్యాప్తు చేయాలని డిప్యూటీ ఎస్పీని ఆదేశించారు. వారు సమర్పించిన నివేదిక ఆధారంగా ఘటనకు కారణమైన ముగ్గురు సిబ్బందిని సస్పెండ్ చేశారు. ఆరోపణలు రుజువైతే నిందితులపై కఠిన చర్యలు తీసుకుంటామని నర్సింగాపూర్ ఎస్డీఓపీ భావనా మరావి తెలిపారు.
