- బీసీల హక్కుల కోసం ఫూలే ఫ్రంట్ పెడ్తం
హైదరాబాద్, వెలుగు: బీసీల హక్కుల సాధన కోసం పోరాడుతానని ఎమ్మెల్సీ కల్వకుంట్ల కవిత అన్నారు. ఇందుకోసం భారత జాగృతి సమన్వయంతో యునైటెడ్ఫూలే ఫ్రంట్(యూపీఎఫ్) ఏర్పాటు చేస్తున్నామని ఆమె చెప్పారు. అసెంబ్లీ ఆవరణలో మహాత్మా జ్యోతిరావు ఫూలే విగ్రహ ఏర్పాటు ఉద్యమం ఇందులో ఆరంభం మాత్రమేనని ఆమె పేర్కొన్నారు. మంగళవారం హైదరాబాద్లోని తన నివాసంలో పలువురు బీసీ సంఘాల నాయకులతో ఆమె సమావేశమయ్యారు. అసెంబ్లీ ఆవరణలో ఫూలే విగ్రహ ఏర్పాటు కోసం ఫిబ్రవరి రెండో వారంలో ధర్నా చౌక్లో మహాధర్నా చేస్తామన్నారు.
ఈ ధర్నాకు బీసీ, ప్రజాసంఘాల నాయకులను ఆహ్వానిస్తామన్నారు. ఇదే డిమాండ్తో ఫిబ్రవరి 5 నుంచి 10వ తేదీ మధ్య అన్ని జిల్లాలతో పాటు యూనివర్సిటీల్లో రౌండ్టేబుల్సమావేశాలు నిర్వహిస్తామన్నారు. విగ్రహ సాధన కోసం ప్రభుత్వంపై ఒత్తిడి పెంచడానికి జాగృతి, యూపీఎఫ్ ప్రతినిధులం నియోజకవర్గాల్లో ఎమ్మెల్యేలను కలిసి వినతిపత్రాలు అందజేస్తామని తెలిపారు. ఫూలే జయంతి (ఏప్రిల్11వ తేదీ) లోపు ప్రభుత్వం సానుకూల నిర్ణయం తీసుకోవాలన్నారు. దేశవ్యాప్తంగా బీసీ కులగణన చేపట్టాలని, స్థానిక సంస్థల్లో బీసీలకు 42 శాతం రిజర్వేషన్లు కల్పించాలని ఉద్యమాలు చేస్తామన్నారు.
