- దయానంద్ నగర్లో ఘటన
- ట్రాక్కు ప్రమాదం వాటిల్లకుండా పైప్లైన్ పనులు షురూ
హైదరాబాద్సిటీ, వెలుగు: మల్కాజిగిరి సర్కిల్, మిర్జాలగూడ వార్డులోని దయానంద్ నగర్ రైల్వే ట్రాక్ కింద భారీ వాటర్పైపులైన్లీకయ్యింది. దయానంద్ నగర్ రైల్వే ట్రాక్ మధ్యలో నీరు ఉబికి పైకి రావడం గమనించిన రైల్వే అధికారులు.. వాటర్బోర్డు దృష్టికి తీసుకెళ్లారు. దీంతో లీకేజీ కొనసాగితే ట్రాక్ కు ప్రమాదం కలగవచ్చని, యుద్ధప్రాతిపదికన రిపేర్లు మొదలుపెట్టారు. ట్రాక్ను ఆనుకుని ఉన్న రిసెప్షన్ పిట్ వద్ద తవ్వకాలు చేపట్టగా, 20 అడుగుల లోతులో 300 మిమీ ఎంఎస్ క్యారియర్ పైప్, 800 మిమీ కేసింగ్ పైప్ కనిపించింది.
దీంతో పనుల కోసం జేసీబీ, ఎయిర్ కంప్రెషర్లు, డీ-వాటరింగ్ పంపులు తెచ్చి చేస్తున్నారు. ప్రస్తుతమున్న300 మి.మీ ఎంఎస్ పైప్లైన్ను పూర్తిగా తొలగించి కొత్తది ఏర్పాటు చేయడమే శాశ్వత పరిష్కారమని నిర్ణయించారు. దీనికి రూ.48 లక్షలు అవుతుందని అంచనా వేశారు. రిపేర్లు పూర్తయ్యేవరకు వాణినగర్, భవానినగర్ ప్రాంతాలకు సరఫరా నిలిపివేశారు. అప్పటివరకు ఇబ్బందులు పడుతున్న ప్రాంతాలకు ఉచితంగా ట్యాంకర్లు సరఫరా చేస్తున్నారు.
